कांग्रेस र एमाले सहकार्य गरेर अगाडी जाने सम्भावना छः ओली

२५ फागुन, काठमाडौं । नेकपा एमालेका अध्यक्ष केपी शर्मा ओलीले नेपाली कांग्रेस र नेकपा एमालेबीच आगामी दिनमा सहकार्य हुनसक्ने बताएका छन् । उनले राजनीतिमा जुनसुकै सम्भावना कायम रहने बताउँदै कांग्रेससँग एमालेको सहकार्य नहुने कुरा कहिँकतै नलेखिएको बताएका छन् । राजनीतिक औचित्य र आवश्यकताका आधार कांग्रेस एमाले मिलेर देशलाई निकास दिने काम हुनसम्ने उनको भनाइ छ ।

बिहीबार राष्ट्रपति पदको निर्वाचनमा मतदान गरेर बाहिरिएपछि नयाँ बानेश्वरस्थित संघीय संसद् भवन परिसरमा सञ्चारकर्मीसँग उनले आगामी दिनमा एमाले नेपाली कांग्रेससँग पनि मिल्न सक्ने बताए । ‘कांग्रेससँग हामी मिल्न सक्छौँ । मिक्दैनौँ भनेर कसम खाएका छैनौँ,उनले भने, ‘राजनीतिमा जुनसुकै सम्भावना कायमै रहन्छ र यो सम्भावना पनि छ ।’

उनले आगामी राष्ट्रपतिबाट देशको हितको रक्षा, सार्वभौम सत्ताको रक्षा, भौगोलिक अखण्डताको रक्षा, राष्ट्रिय हित र स्वाभिमानको रक्षा, लोकतन्त्रको रक्षा,जनताप्रति उत्तरदायी, संविधानको पक्षमा उभिने, संविधानको पक्षमा उभिनलाई आफ्नो स्वार्थमा व्याख्या गर्ने, त्यसलाई संविधानसम्मत लोकतान्त्रिक कोणबाट व्याख्या गर्ने, देशप्रति बफादार भएर संविधानको रक्षक, पालकको हिसाबले देशको अभिभावकको भूमिका बहन गर्नसक्ने राष्ट्रपति आवश्यक रहेको बताए ।

उनले संकीर्ण स्वार्थ बोकेकाहरुले सानो स्वार्थ पूरा भएन भनेर यसअघिको राष्ट्रपतिको मर्यादा नगरेको भन्दै राष्ट्रपतिय प्रणालीलाई नै मन नपराउने, जन्मिदै श्रेष्ट भनेर जस्तो भएपनि पुज्ने बानी परेका र संकीर्णताका काम गर्नेहरुले देशका लागि अडेर काम गरे भनेर बिरोध भएको उल्लेख गरे ।

नयाँ राष्ट्रपति चयनका लागि अहिले मतदान जारी छ । नयाँ राष्ट्रपतिका लागि आठदलीय गठबन्धनका तर्फबाट नेपाली कांग्रेसका नेता रामचन्द्र पौडेल र नेकपा एमालेका उपाध्यक्ष सुवास नेम्वाङ प्रतिस्पर्धामा छन् । अध्यक्ष ओलीले केहि दिन अगाडी पनि राष्ट्रपतिको निर्वाचनपछि राजनीतिक अवस्था फेरिन सक्ने भन्दै लोकतन्त्रको रक्षा र राष्ट्रियहितका विषयमा नेपाली कांग्रेस र नेकपा एमालेबीच सहकार्य हुनसक्ने बताएका थिए ।