जसपाले गर्यो रामसहायलाई उपराष्ट्रपतिको उम्मेदवार बनाउने निर्णय

२५ फागुन, काठमाडाैं । जनता समाजवादी पार्टी (जसपा)ले सांसद रामसहायप्रसाद यादवलाई उपराष्ट्रपतिको उम्मेदवार बनाउने निर्णय गरेको छ । जसपाको बिहीबार दिउँसो बसेको केन्द्रीय कार्यकारिणी समितिको बैठकले यादवलाई उपराष्ट्रपति उम्मेदवार उठाउने निर्णय गरेको हो ।

यादव प्रतिनिधिसभामा जसपाको संसदीय दलको नेता हुन् । उनी बारा–२ बाट प्रतिनिधिसभा सदस्य छन् । ८ दलीय गठबन्धनमा आवद्ध जसपाले बिहीबार राष्ट्रपतिका कांग्रेसका उम्मेदवार रामचन्द्र पौडेललाई मतदान गरेको थियो । पौडेल तेस्रो राष्ट्रपतिको रुपमा निर्वाचित भइसकेका छन् ।

गठबधनमा उपराष्ट्रपति कुन पार्टीले लिने भन्नेबारे टुंगो लागिनसकेको अवस्थामा सुरुदेखि नै जसपाले उपराष्ट्रपतिमा दाबी गर्दै आइरहेको छ ।

आगामी चैत ३ मा हुने को उपराष्ट्रपतिको चुनावका लागि पर्सि शनिबार उम्मेदवारी दर्ताको तालिका छ । यादवलाई उम्मेदवार बनाउने निर्णय पार्टीले लिएको विषय भोलि बस्ने गठबन्धनको बैठकमा राख्ने जसपाका नेता प्रदीप यादवले बताए ।

राष्ट्रपति र उपराष्ट्रपतिमध्ये एक जना महिला हुनुपर्ने मान्यता भएपनि यादवलाई मधेशी समूदायबाट उम्मेदवार बनाउने प्रयास सुरु भएको छ । स्थानीय तहका प्रमुख र उपप्रमुखमध्ये एक जना महिला हुनुपर्ने मान्यता बोकेका दलहरु स्पष्ट कानून नभएकै कारण फरक फरक समूदायमा महिला दुवै पदमा महिला वा पुरुष निर्वाचित भएको अवस्था छ । राष्ट्रपति र उपराष्ट्रपतिमा पनि यही खेल हुने देखिएको छ ।

रामसहायलाई उपराष्ट्रपतिमा उम्मेदवार बनाउन जसपा सफल भएमा यादवको क्षेत्रमा पार्टी अध्यक्ष उपेन्द्र यादव उपनिर्वाचनमा उम्मेदवार बन्ने र जितेर संसद छिर्ने दाउमा छन् । अध्यक्ष यादव मंसिरमा सम्पन्न प्रतिनिधिसभा निर्वाचनमा सप्तरी २ मा जनमत पार्टीका अध्यक्ष सिके राउतसँग पराजित भएका थिए ।