उपराष्ट्रपतिबारे निर्णय लिन संयोजक खड्काले बोलाए कार्यदलको बैठक

२६ फागुन, काठमाडौं । दशदली गठबन्धनले उपराष्ट्रपतिको उम्मेदवारबारे विवाद देखिने अवस्था आएपछि उम्मेदवार र निर्वाचनबारे निर्णय लिन गठबन्धन अन्तर्गतको कार्यदलको बैठक बोलाएको छ । नेपाली कांग्रेसका उपसभापति पूर्णबहादुर खड्काको नेतृत्वमा गठन भएको कार्यदलमा गठबन्धन दलका दोस्रो तहका नेताहरु रहेका छन् ।

आजको छलफलमा नेपाली कांग्रेस,नेकपा माओवादी केन्द्र नेतृत्वसहित १० दलका प्रतिनिधि उपस्थित रहेने बताइएको छ । कांग्रेस उपसभापति पूर्णबहादुर खड्का संयोजकत्वको कार्यदलमा सबै दलका दोस्रो तहका नेताहरू दिउँसो २ बजे सिंहदरवारमा भेला हुने कार्यक्रम तय भएको छ । उपराष्ट्रपतिमा नागरिक उन्मुक्ति पार्टीले पनि दावी गरेपछि संयोजक खड्काले उपराष्ट्रपतिको निर्णय गर्न कार्यदलको बैठक बोलाएका हुन् । । बैठक शुक्रबार दिउँसो २ बजे सिंहदरबारस्थित कांग्रेस संसदीय दलको कार्यालयमा बस्ने बताइएको छ ।

गठबन्धनबाट राष्ट्रपतिमा कसलाई उम्मेदवार बनाउने भन्ने विषयमा निर्णय भइसकेको छैन । बैठकमा उपराष्ट्रपतिको उम्मेदवार चयन, मनोनयन दर्ता र निर्वाचनको तयारीका विविध विषयमा छलफल हुने नेताहरूले बताएका छन् । ३ चैतमा हुने उपराष्ट्रपतिको निर्वाचनकालागि आयोगले शनिबार उम्मेदवारी मनोनयन गर्ने कार्यतालिका सार्वजनिक गरिसकेको छ ।