सिके राउतले पनि दाबी गरे उपराष्ट्रपति, ममता झालाई उम्मेदवार बनाउने

२६ फागुन, काठमाडौं । सिके राउत नेतृत्वको जनमत पार्टीले ममता झालाई उपराष्ट्रपति उठाउने भएको छ । जनमत पार्टीले पछिल्लो पटक उपराष्ट्रपति पद आफूले पाउनु पर्ने दाबी सुरु गर्दै झाको नाम अघि सारेको हो ।

सदभावना पार्टीबाट राजनीति सुरु गरेकी ५३ वर्षीय झा जनमतकी सप्तरी जिल्ला इञ्जार्ज हुन् । उनी स्थानीय तह चुनावमा राजविराज नगरपालिकाको मेयरमा पराजित भएकी थिइन् । यता मधेस केन्द्रित दल उपेन्द्र यादव नेतृत्वको जनता समाजवादी पार्टी (जसपा) नेपालले पनि उपराष्ट्रपतिमा पार्टीका सांसद रामसहायप्रसाद यादवलाई उम्मेदवार उठाउने निर्णय गरिसकेको छ ।

नागरिक उन्मुक्ति पार्टी (नाउपा)ले पनि उपराष्ट्रपति आफूले पाउनु पर्ने दाबी सुरु गरेको छ । भावी उपराष्ट्रपति चयनका लािग आगामी चैत ३ गते हुने मतदानका लागि भोलि शनिबार मनोनय दर्ता गर्ने निर्वाचन तालिका छ ।

उपराष्ट्रपतिमाा दाबी गरेका तीन वटै दल सत्ताघटक आवद्ध ८ दलीय गठबन्धनमा सामेल छन् । गठबधन्धनबाट यसअघि राष्टपति उम्मेदवार चयन गर्दा कांग्रेसका उम्मेदवारलाई समर्थन गर्नेमा एक मत देखिएका थिए । तर उपराष्ट्रपतिको चुनावमा भने उनीहरु विभाजित हुन पुगेका छन् ।