उपराष्ट्रपतिमा गठबन्धनकातर्फबाट जसपाका यादवले दिए उम्मेदवारी

२७ फागुन, काठमाडौं । आठदलीय गठबन्धनका तर्फबाट जनता समाजवादी पार्टी (जसपा) का संसदीय दलको नेता रामसहायप्रसाद यादवले उपराष्ट्रपति पदमा उम्मेदवारी दिएका छन् । शनिबार नयाँ बानेश्वरस्थित संसद् भवनमा रहेको राष्ट्रपति तथा उपराष्ट्रपति निर्वाचन अधिकृतको कार्यालय पुगेर यादवले उम्मेदवारी दर्ता गरेका हुन् ।

यादवले सत्ता गठबन्धनका तर्फबाट उपराष्ट्रपति पदमा उम्मेदवारी दिएका हुन् । सत्ता गठबन्धनबाट उपराष्ट्रपतिमा ३ जनाको उम्मेदवारी पर्ने सम्भावना रहेपनि जसपाले यसबारे आधिकारिक निर्णय गर्नेछ । शनिबार बिहान प्रधानमन्त्री निवासमा बसेको गठबन्धनको बैठकमा सहमति नजुटेपछि जनमत पार्टीबाट १ जना र जनता समाजवादी पार्टीबाट २ जनाले उम्मेदवारी दिने भनिएको थियो ।

रामसहायसँगै जसपाबाट प्रमिला यादवले पनि उम्मेदवारी दिने बताइएको छ । जनमत पार्टीबाट ममता झाले उपराष्ट्रपतिमा उम्मेदवार दिएकी छन् । यसअघि एमालेबाट उपाध्यक्षसमेत रहेकी अष्टलक्ष्मी शाक्यले उपराष्ट्रपतिमा उम्मेदवार दिएका छन् ।

आठ दलीय गठबन्धनले उपराष्ट्रपतिमा जसपाका उमेदवारलाई सहयोग गर्ने भएको छ । आज बसेको गठबन्धनको संयुक्त बैठकले उपराष्ट्रपतिमा जसपाका उमेदवारलाई सहयोग गर्ने निर्णय गरेको नेकपा एसका महासचिव डा. बेदुराम भुसालले जानकारी दिए ।

महिला वा पुरुष कसलाई उमेदवार बनाउने भन्नेबारे निर्णय गर्न जसपाको केन्द्रीय कार्यकारिणी समितको बैठक आज बस्दै छ । राष्ट्रपतिमा पुरुष निर्वाचित भइसकेकाले अब उपराष्ट्रपतिमा महिला उमेदवार हुनु पर्ने निर्वाचन आयोगले स्पष्ट पारिसकेको छ ।