उपराष्ट्रपति पदका लागि ममता झाको उम्मेदवारी दर्ता

२७ फागुन, काठमाडौं । उपराष्ट्रपति पदका लागि जनमत पार्टीका तर्फबाट ममता झाले उम्मेदवारी दर्ता गराएकी छिन । सङ्घीय संसद् भवन नयाँ बानेश्वरमा जनमत पार्टीका शीर्षनेताहरुको उपस्थितिमा उनले उम्मेदवारी दिएकी हुन ।

जनमत पार्टीका तर्फबाट उम्मेदवारी दिएकी झाको प्रस्तावकमा नेताहरु अब्दुल खान, अनिता देवी, गङ्गाराम चौधरी, अविराम शर्मा र रूपाकुमारी यादव छिन । त्यस्तै समर्थकमा गोमा लाभ सापकोटा, विनिताकुमारी सिंह, वसन्तकुमार कुशवाह, रामप्रकाश चौधरी र रानीकुमारी तिवारी छिन ।

सङ्घीय संसद्भवन नयाँ बानेश्वरमा सञ्चारकर्मीसँग कुरा गर्दै जनमत पार्टीका अध्यक्ष सिके राउतले सत्ता गठबन्धनले आइतबारसम्म साझा उम्मेदवार बनाउने विश्वास व्यक्त गरिन । सहमति नभएको खण्डमा मित्रवत् प्रतिस्पर्धा हुने उनको भनाइ थियो ।

त्यस्तै, उम्मेदवारी दर्ता गरेपछि झाले नेपालको संविधानको मर्मलाई जीवित राख्नका लागि आफूले जनमत पार्टीका तर्फबाट उम्मेदवारी दिएको बताइन । सञ्चारकर्मीको एक प्रश्नको जवाफ दिँदै उनले आफूविरुद्ध कुनै पनि मुद्दा नरहेको उल्लेख गरिन ।