प्रहरीको हिरासत फोडेर फरार थुनुवामध्ये थप १ जना पक्राउ

२८ फागुन, जनकपुरधाम । धनुषाको महेन्द्रनगर इलाका प्रहरी कार्यालयको हिरासत फोडेर फरार रहेका थप एक थुनुवालाई पक्राउ गरेकाे छ । पक्राउ पर्नेमा धनुषाको मिथिला नगरपालिका-७ का ३६ वर्षीय शंकर महतो रहेका छन् ।

उनलाई शनिबार राति ८ बजे पर्साको वीरगञ्ज महानगरपालिका–१६ इनर्वास्थित भन्सार हुँदै लुकीछिपी नेपालबाट भारततर्फ गइरहेको अवस्थामा पक्राउ गरेको धनुषा प्रहरीले जनाएको छ । माघ १२ गते उनी हातहतियार खरखजाना मुद्दामा मिथिला नगरपालिका २ स्थित नक्टाझिजबाट पक्राउपछि हिरासतमा राखिँदै आएका थिए ।

त्यसको झण्डै एक महिनापछि गत फागुन १५ गते राति इलाका प्रहरी कार्यालय सखुवा महेन्द्रनगरको हिरासत फोडेर भाग्ने ६ जना थुनुवामा उनी पनि थिए । ४ जनालाई यसअघि नै पक्राउ गरिसकेको छ । फरार रहेका अन्य १ जनाको खोजी भइरहेको प्रहरीले जनाएको छ ।