शोधनान्तर बचत १ खर्ब ३३ अर्ब, चालु खाता घाटामा पनि सुधार

२८ फागुन, काठमाडौं । चालु आर्थिक वर्षको ७ महिना सकिंदा माघमा शोधनान्तर बचत १ खर्ब ३३ अर्ब २१ करोड पुगेको नेपाल राष्ट्र बैंकले जनाएको छ ।

नेपाल राष्ट्र बैंक आर्थिक अनुसन्धान विभागले आर्थिक वर्षको ७ महिनाको तथ्यांकको आधारमा मुलुकको आर्थिक तथा वित्तीय अवस्थाको प्रतिवेदनमा उक्त तथ्यांक सार्वजनिक गरेको हो ।

पुस मसान्तमा ९७ अर्ब १० करोड रहेको शोधनान्तर बचत माघ महिनामा मात्रै थप ३६ अर्ब ११ करोडले वृद्धि भएको हो । अमेरिकी डलरमा शोधनान्तर बचत १ अर्ब १ करोड रहेको राष्ट्र बैंकले जनाएको छ ।

आयातमा संकुचन र रेमिट्यान्स वृद्धि हुँदा बाह्य क्षेत्र निरन्तर सुधार हुँदै गएको छ । चालु आर्थिक वर्ष २०७९÷८० को सुरुको दुई महिना साउन र भदौमा घाटामा रहेको थियो । असोजपछि भने लगातार बचतमा रहेको छ ।

गएको आर्थिक वर्षको सोही अवधिमा शोधनान्तर स्थिति २ खर्ब ४७ अर्ब ३ करोडले घाटामा रहेको थियो । माघ महिनामा उल्लेख्य मात्रामा शाेधनान्तर बचतमा सुधार भएकाे हाे ।

शोधनान्तर स्थितिमा मात्रै नभई चालु आर्थिक वर्षमा चालु खाता घाटमा पनि सुधार भएको छ । गत आर्थिक वर्षको ७ महिनामा ४ खर्ब ११ अर्ब ३४ करोड रहेको शोधनान्तर घाटा चालु आर्थिक वर्षको माघ मसान्तमा आउँदा २९ अर्ब ६४ करोडले मात्रै घाटामा रहेको छ ।

व्यापार घाटामा आएको ह्रास र रेमिट्यान्समा भएको एक चौथाई वृद्धिका कारण शोधनान्तर स्थित र चालु खातामा सुधार आएको हो ।