राज्यले द्वन्द्वकालीन विषयमा जबर्जस्त गर्न खाेज्दैछ : विप्लव

२८ फागुन, काठमाडौं । नेकपाल कम्युनिष्ट पार्टी (नेकपा)का महासचिव नेत्रविक्रम चन्द ‘विप्लव’ले राज्यले द्वन्द्वकालीन मुद्दालाई बोकेर माओवादी नेता कार्यकर्ताहरुलाई जबर्जस्त जेल हाल्ने काम गरेमा आफूहरु चुप नबस्ने बताएका छन् ।

द्वन्द्वकालीन घटनाका विषयमा तत्कालीन विद्रोही पक्षका नेतृत्व समेत रहेका प्रधानमन्त्री पुष्पकमल दाहालविरुद्ध सर्वोच्च अदालतमा दायर भएको मुद्दा विचराधीन रहेको बेला माओवादीका ९ घटकहरुले आइतबार काठमाडौंमा आयोजित संयुक्त पत्रकार सम्मेलनमा बोल्दै महासचिव विप्लवले राज्यले खाली माओवादीलाई सिध्याउनेबारे सोच्ने काम गरे आफूहरु जस्तोसुकै तहका प्रतिवाद गर्ने बताए ।

राष्ट्रिय स्वाधीनता र नागरिकलाई पूर्ण अधिकार दिने एजेण्डामा मुलुकमा १० वर्षसम्म माओवादीको नेतृत्वमा सशस्त्र द्वन्द्व चलेको बताउँदै त्यो कुरा विस्तृत शान्ति सम्झौतामा उल्लेख भएनुसार राज्यले लागू नगरेको बताए ।

सम्झौता पूर्णरुपमा कार्यान्वयन नभइरहेको अवस्थामा राज्यले फेरि द्वन्द्वका एकाध घटनालाई बोकेर नेता कार्यकर्तालाई जेल हाल्ने काम गरे मुलुकमा थप द्वन्द्व चल्ने र त्यसको जिम्मेवारी राज्यले लिनुपर्ने उनको भनाइ छ ।

नागरिक दिनदिनै नाफाखोर र मिटरब्याजीहरुको चरम शोषणमा परेर सडकमा शरीरमा आगो लगाएर मृत्युको बाटो लिइरहेको विषयमा ध्यान नदिएर द्वन्द्व बल्झाउने र मुठ्ठीभर दलालहरुलाई लाभ पुर्याउने काममा लागेको आरोप लगाए ।

अधिकारका लागि चलाएको संघर्ष पूरा हुन बाँकी नै रहेको बताउँदै मुलुकलाई स्वाधीन बनाउने र जनतालाई पूर्णअधिकार दिलाउने विषयमा अदालतलाई देखाएर जबर्जस्त गर्न खोजिए त्यसलाई ठेगान लगाउने तागत आफूहरुसँग रहेको बताए ।