एउटै व्यक्ति राष्ट्रपतिमा दाेहाेरिने व्यवस्था हटाऔं, प्रतिफल नदिने याेजना नबनाऔं : महामन्त्री शर्मा

३० फागुन, काठमाडौं । नेपाली काङ्ग्रेसका महामन्त्री विश्वप्रकाश शर्माले एक व्यक्ति एकपटक मात्र राष्ट्रपति बन पाउने व्यवस्था गर्नुपर्नेमा जोड दिएका छन् ।

राजनीतिमा मान्छेहरूलाई आकर्षित गर्नका लागि पनि एकपटक राष्ट्रपति, दुई पटकसम्म प्रधानमन्त्री, तीन पटकसम्म मन्त्री र चार पटकसम्म सांसद बन्ने पाउने व्यवस्था आवश्यक रहेको बताए ।

नेपाल ट्रेड युनियन काङ्ग्रेसको मंगलबारदेखि काठमाडौंमा सुरु भएको नीति सम्मेलनमा बोल्दै महामन्त्री शर्माले एउटै व्यक्ति राष्ट्रपतिमा दोहोरिने व्यवस्थाले राजनीतिमा वितृष्ण बढेको बताए । प्रधानमन्त्रीमा एउटै व्यक्ति पाँच पटक पुग्दासमेत नपुगेको देखेर झनै वितृष्णले सीमा नाघ्दै गएको उनको भनाइ थियो ।

राजनीतिमा आएर पटकपटक राष्ट्रपति, प्रधानमन्त्री र मन्त्री बन्ने खेलमै समय जाने र देशको आर्थिक रूपान्तरणको काममा योगदान दिन नसक्ने बताए । उनले एकैपटक देशभर भ्यू टावर र अन्तर्राष्ट्रिय विमानस्थल बनाउने काम व्यवहारिक नभएको बताए । प्रतिफल दिने आयोजना मात्र छनौट गरिनुपर्ने बताए । प्रतिफल दिन नसक्ने धेरै योजना बनाएर मुलुकमा आर्थिक भार थपिने उनको भनाइ थियो ।

अहिले नै रेल चलाएर आर्थिक उपार्जन हुन नसक्ने बताउँदै महामन्त्री शर्माले तत्काल गर्न सकिने र प्रतिफल दिने योजनामा मात्र बजेट छुट्याउनुपर्ने बताए । जनताको जीवनसँग तुरुन्त जोडिने योजनाले मात्र सरकारप्रति नागरिकको भरोसा बढने उनले बताए ।

कांग्रेस उपराष्ट्रपति निर्वाचनपछि सरकारमा जाने तयारीमा छ ।