नगर सरसफाइका लागि मानव साङ्लो, नगरवासीकाे उत्साहजनक सहभागिता

३० फागुन, बुटवल । रुपन्देहीको तिलोत्तमा नगरपालिकाले नगर सफाईका लागि मानव साङलो निकालेको छ । नगरपालिकाले सुरु गरेको सरसफाइ अभियानमा ऐक्यवद्धता जनाउँदै मंगलबार मानव साङ्लो निकालिएको छ ।

२०७४ सालदेखि नगरपालिकाले सञ्चालन गरेको समुदायमा आधारित हरियाली प्रवर्द्धन एवं नियमित सरसफाइ अभियानमा नगरवासीले उत्साहजनक सहभागिता जनाइरहेका छन् ।

प्रत्येक महिनाको १ र १५ गते नियमित सरसफाइ गर्दै आइरहेको छ । सोही क्रममा आज बेलहिया बुटवल ६ लेन सडक खण्डको योगीकुटीदेखि कोटिहवासम्म १३ किलोमिटर सडकमा सहभागीहरूले आपसमा हात जोडेर सरसफाइ अभियानमा प्रतिबद्धता जनाए ।

सरसफाइ र हरियाली प्रवर्द्धन अभियान तिलोत्तमाको पहिचान र सभ्यता बन्दै गएको रअभियानमा नगरबासीको प्रतिवद्धता र एकता महत्वपूर्ण सन्देश रहेको अभियानका संयोजक सुरेन्द्र श्रीले बताए ।

नगरवासीले आफ्नो फोहोर आफैं व्यवस्थापन गर्ने, जथाभावी फोहोर नगर्ने, नगरपालिकाले चलाएका अभियानमा पूर्णरुपमा सहयोग गर्ने प्रतिबद्धता जनाएको उनले बताए ।

मणिग्राम चोकमा सरसफाइ स्मारक निर्माण गरिएको छ । नगरको क्षेत्रभित्रका सडकमा घेराबार, फूलको बिरुवा राेप्ने, हरियाली बनाउने काम तीव्र गतिमा चलिरहेको छ । नगरपालिकाले बढाएको काममा नगरवासीबाट सक्दो साथ पाइरहेको नगर प्रमुख रामकृष्ण खाणले बताए ।

‘स्वच्छ र सफा नगर’ नारा नै पालिकाको मुख्य रहेको उपप्रमुख जगेश्वरदेवी चौधरीले बताए । नगरवासी आफ्नो फोहोर आफैं व्यवस्थापन गर्न अभ्यस्त हुँदै गएको उनको भनाइ छ ।