राष्ट्रिय टिमको सहायक प्रशिक्षकमा कटुवाल नियुक्त

१ चैत, काठमाडौं । अखिल नेपाल फुटबल संघ (एन्फा)ले मछिन्द्र क्लबका प्रशिक्षक प्रवेश कटुवाललाई राष्ट्रिय टिमको सहायक प्रशिक्षकमा नियुक्त गरिएको छ ।

ए डिभिजन लिगको डिफेन्डिङ च्याम्पियन मछिन्द्र क्लब सम्हालिरहेका प्रवेशलाई अखिल नेपाल फुटबल संघ एन्फाले नियुक्ति दिएको हो ।
एन्फाले राष्ट्रिय फुटबल टिमका प्रशिक्षक भिनसेन्जो अल्बर्टो एनेसलाई यसअघि नै नियुक्त गरिसकेको छ ।

कटुवालले २०६१ सालमा थ्री स्टार क्लबबाट लिग फुटबल खेल्न थालेका थिए । उनले मनाङ मस्र्याङ्दी, आरसीटी र मछिन्द्रबाट खेलेका थिए ।

उनले कात्तिक ३० गते पाकिस्तानविरुद्धको मैत्रीपूर्ण खेलमा पनि राष्ट्रिय टिमको प्रशिक्षकको जिम्मेवारी सम्हाले । एएफसी ए लाइसेन्स पूरा गरेपश्चात पहिलो पटक २०७६ सालमा ए डिभिजन लिगमा प्रशिक्षकको रुपमा काम गरेका थिए । मछिन्द्रलाई लागातार २ पटक लिग च्याम्पियन दिलाए ।

काठमाडौंमा चैत ८ गतेदेखि सुरु हुने प्रधानमन्त्री कप त्रिदेशीय फुटबल प्रतियोगिताका लागि राष्ट्रिय टिमको तयारीको जिम्मेवारी पनि उनलाई परेको छ ।