यती एयरकाे विमान दुर्घटना जाँच आयोगको म्याद थप

१ चैत, काठमाडौं । गएको मघ १ मा पोखरामा भएको यती एयरलाइन्सको विमान दुर्घटनाको जाँचबुझ गर्न गठित आयोगको म्याद ४५ दिन थप भएको छ ।

मंगगलबार बसेको मन्त्रिपरिषद बैठकले आयोगको म्याद ४५ दिन थप गरेको सरकारका प्रवक्ता सञ्चार तथा सूचना प्रविधिमन्त्री रेखा शर्माले बुधबारजानकारी दिइन् । आयोगले काम सक्न बाँकी रहेकाले म्याद थपका लागि गरेको आग्रहबमोजिम म्याद थप गरिएको शर्माले बताइन् । काठमाडौंबाट गएको यती एयरको विमान पोखराको सेती खोँचमा खस्दा चालक दलका ४ सदस्यसहित ७२ जनाको मृत्यु भएको थियो ।

सरकारले सोही दिन पूर्व सचिव नागेन्द्र घिमिरेको संयोजकत्वमा हवाइ विज्ञहरुसमेत संलग्न ५ सदस्यीय दुर्घटना जाँच आयोग गठन गरेको थियो । सुरुमा आयोगलाई दिइएको ४५ दिनको समयमा तयार पारिएको प्रारम्भिक प्रतिवेदनमा दुर्घटनाको १४ सेकेण्ड अगाडि पाइलट अञ्जु खतिवडाबाट प्रशिक्षक पाइलट कमल केसीले कमाण्ड लिएको उल्लेख गरेको थियो ।