बढ्यो दुधको मूल्य, अब डीडीसीको प्रतिलिटर ९७ रुपैयाँ कायम

१ चैत, काठमाडौं । सरकारले दुधको उत्पादन मूल्य बढाएपछि समग्र बजारमा दुधको मूल्यबृद्धि भएको छ । सरकारी स्वामित्वमा रहेको नेपाल दुग्ध विकास संस्थान (डीडीसी) ले पनि प्रतिलिटर ११ रुपैयाँले बढाउँदै बिहीबारबाट प्रतिलिटर दुधको मूल्य ९७ रुपैयाँ पुर्याउने भएको छ । कृषि तथा पशुपक्षी विकास मन्त्रालयले डीडीसीलाई मूल्य बढाउन अनुमति दिएको मन्त्रालयका एक कर्मचारीले नेपालबहसलाई जानकारी दिएका छन् । मूल्य बढेसँगै सर्वसाधारण उपभोक्ताले अब बजारबाट दुध खरिद गरेर खान नसक्ने अवस्था आएको छ ।

यसअघि सरकारी स्वमित्वको डीडीसीले प्रतिलिटर ८६ रुपैयाँमा बिक्रीवितरण गर्दै आएको थियो । डीडीसीले दूधको मूल्य प्रतिलिटर ११ रुपैयाँले बढाएको छ । कृषि तथा पशुपन्छी विकास मन्त्रालयको लिखित सहमतिमा बिहीबारदेखि लागू हुने गरी दूधको उपभोक्ता मूल्य बढाउने निर्णय भएको ती कर्मचारीले बताए । संस्थानलाई भोलीदेखि मूल्य बढाएर बेच्न भनिएको छ । उसले पनि मन्त्रालयमा भएको सहमति अनुसार प्रतिलिटर ११ रुपैयाँ बढाएर बिक्री  वितरण गर्नेछ ।

अब डीडीसीको दूधको प्रतिलिटर मूल्य ८६ रुपैयाँबाट बढाएर ९७ रुपैयाँ कायम गरिएको उनले बताए । सरकारले यसअघि वृद्धि गरेको दूधको किसान मूल्य पनि बुधबार १ चैतदेखि लागू गर्ने निर्णय भएको थियो । संस्थान बोर्ड बैठकले मन्त्रालयको सिफारिसमा दूधको मूल्य ११ रुपैयाँले वृद्धि गर्ने निर्णय भएको जानकारी दिएको छ । बढेको दूधको उपभोक्ता मूल्य बिहीबारदेखि लागू हुनेछ भने किसान मूल्य आजैदेखि कार्यान्वयनमा आउने भएको छ । दही, पनिर लगायतका दुग्ध पदार्थको मूल्य भने केही दिनमा मात्रै मूल्य बढाइने भएको छ ।

गत १९ फागुनमा सरकारले किसानले पाउने दूधको मूल्य बढाउने निर्णय गरेको थियो । ३ प्रतिशत फ्याट ८ एसएनएफयुक्त दूधको किसान मूल्य ५६ रुपैयाँबाट बढाएर सरकारले ६५ रुपैयाँ पुर्याएको थियो । त्यसको एक सातापछि २५ फागुनमा निजी क्षेत्रका डेरी उद्योगहरुले दूध तथा दुग्ध पदार्थको मूल्य वृद्धि गरेका थिए । निजी डेरीहरुले दूधको मूल्य लिटरमा १४ रुपैयाँले बढाएका थिए भने दुग्धजन्य पदार्थको मूल्य लिटरमा २ सय रुपैयाँसम्मले बढाएका थिए । मूल्य बढसँगै कम आय भएका सर्वसाधारण भने मर्कामा परेका छन् ।