उपराष्ट्रपतिका लागि मतदान जारी, दुई उम्मेदवारले मत हाल्न नपाउने

३ चैत, काठमाडौं । उपराष्ट्रपति चयनका लागि नयाँ बानेश्वरस्थित संसद् भवन परिसरमा मतदान सुरु भएको छ । निर्वाचन आयोगले मतदानको समय बिहान १० बजेबाट दिउँसो ३ बजेसम्म तोकेको छ । उपराष्ट्रपतिका उम्मेदवार अक्ष्टलक्ष्मी शाक्य र ममता झाले सांसद नभएका कारण आफुले आफैलाई पनि मत हाल्न नपाउने भएका छन् । नयाँ उपराष्ट्रपतिको निर्वाचनको नतिजा पनि आजै आउनेछ । गठबन्धन साझा उम्मेदवार दिन असफल भएको छ भने राष्ट्रिय प्रजातन्त्र पार्टीले मतदान नगर्ने निर्णय गरेको छ ।

उपराष्ट्रपति पदका लागि जनता समाजवादी पार्टी नेपालबाट रामसहाय यादव, नेकपा एमालेबाट अष्टलक्ष्मी शाक्य, जनता समाजवादी पार्टीबाटै प्रमिला कुमारी र जनमत पार्टीबाट ममता झाको उम्मेदवारी परेको छ । उपराष्ट्रपतिमा उम्मेदवार रामसहायप्रसाद यादवले मतदान गरिसकेका छन् भने अन्य उम्मेदवारहरु अष्टलक्ष्मी शाक्य र ममता झाले सांसद नभएका कारण मतदान गर्न नपाएका हुन् ।रामसहाय यादव गठबन्धनका साझा उम्मेदवारका रूपमा रहेका छन् भने प्रमिला कुमारीले आफ्नो उम्मेदवारी निष्क्रिय बनाएको घोषणा गरेकी छिन् । गठबन्धनमै रहे पनि जनमत पार्टीले मित्रवत् प्रतिस्पर्धा गर्ने भन्दै उम्मेदवारी कामय राखेको छ । राष्ट्रपति तथा उपराष्ट्रपति निर्वाचन अधिकृतको कार्यालयले शुक्रबार नै नतिजा आउने बताएको छ ।

उपराष्ट्रपति पदको निर्वाचनमा प्रतिनिधिसभा र राष्ट्रियसभा र प्रदेशसभाका सांसदले मतदान गर्नेछन् । प्रदेशसभाका ५५० र संघीय संसद्का ३३२ मतदाता रहेका छन् । मतदाताको अन्तिम नामावलीमा नाम समावेश भइसकेपछि जनता समाजवादी पार्टी (जसपा)की सांसद सहनाज रहमानको निधन भएको थियो । मतदानका लागि प्रदेश र संघीय सांसदहरूलाई छुट्टाछुट्टै मतदान केन्द्र तोकिएको छ । उपराष्ट्रपति निर्वाचनमा एक संघीय सांसदको मतभार ७९ र एक प्रदेश सांसदको मतभार ४८ गणना हुन्छ ।

उपराष्ट्रपति निर्वाचनको मतपरिणाम आजै साँझ सार्वजनिक गरिने निर्वाचन अधिकृतको कार्यालयले जनाएको छ । नयाँ उपराष्ट्रपतिका लागि चार उमेदवार छन् । जसपाकी उम्मेदवार प्रमिला कुमारीले रामसहायलाई समर्थन गर्दै उमेदवारी निष्क्रिय भएको बताएकी छन् । तर, निधारित अवधिभित्र उनले उमेदवारी फिर्ता लिएकी थिइनन् । त्यसैले मतपत्रमा उनको पनि नाम र तस्बिर कायम छ । उमेदवारी निष्क्रिय गरेको बताएकाले मतचाहिँ नपाउने बताइएको छ ।