बुबाको किरिया बसेका बरालले पोखराबाट आएर गरे मतदान

३ चैत, काठमाडौं । उपराष्ट्रपति पदका लागि शुक्रबार भएको निर्वाचनमा पाखेरबाट हवाइ जहाजमार्फत काठमार्डौं आएर बुबाको किरियापुत्री बसिरहेका प्रकाश बरालले मतदान गरेका छन् । गण्डकी प्रदेशको कास्की निर्वाचन क्षेत्र नम्बर ३ (२) का प्रदेशसभा सदस्य प्रकाश बरालले विहान पोखराबाट संघीय संसद भवनमा आएर मतदान गरेका हुन् ।

पिता लोकराजको निधनमा अशौच बारिरहेका बरालले शुक्रबार बिहान पोखराबाट आएर मतदान गरेपछि उनी दिउँसो पोखरा फर्कने तयारीमा छन् । सामान्यतय किरियापुत्री बसेको व्यक्ति यति लामो यात्रमा नसिस्कने प्रचलन छ । किरिया बसेको व्यक्तिलाई अरुले छुन नहुने धार्मिक मान्यता छ । उनले संविधानले दिएको जिम्मेवारी र आफ्नो कर्तव्य पूरा गर्ने सन्दर्भमा उपराष्ट्रपति निर्वाचनमा मतदानका लागि पोखरबाट यास्तो अवस्थामा पनि काठमाडौं आएर मतदान गरेको बताएका छन् ।

पोखरा २२ स्थायी घर भएका सांसद बरालका पिता लोकराज बरालको ८२ वर्षको उमेरमा शुक्रबार निधन भएको थियो । उपराष्ट्रपति चयनका लागि नयाँ बानेश्वरस्थित संसद् भवन परिसरमा मतदान जारी छ ।निर्वाचन आयोगले मतदानको समय बिहान १० बजेबाट दिउँसो ३ बजेसम्म तोकेको छ । उपराष्ट्रपति पदका लागि जनता समाजवादी पार्टी नेपालबाट रामसहाय यादव, नेकपा एमालेबाट अष्टलक्ष्मी शाक्य, जनता समाजवादी पार्टीबाटै प्रमिला कुमारी र जनमत पार्टीबाट ममता झाको उम्मेदवारी परेको छ ।

उपराष्ट्रपति पदको निर्वाचनमा प्रतिनिधिसभा र राष्ट्रियसभा र प्रदेशसभाका सांसदले मतदान गर्नेछन् । प्रदेशसभाका ५५० र संघीय संसद्का ३३२ मतदाता रहेका छन् । मतदाताको अन्तिम नामावलीमा नाम समावेश भइसकेपछि जनता समाजवादी पार्टी (जसपा)की सांसद सहनाज रहमानको निधन भएको थियो । मतदानका लागि प्रदेश र संघीय सांसदहरूलाई छुट्टाछुट्टै मतदान केन्द्र तोकिएको छ । उपराष्ट्रपति निर्वाचनमा एक संघीय सांसदको मतभार ७९ र एक प्रदेश सांसदको मतभार ४८ गणना हुन्छ ।