नेपालमा सच्चा पत्रकारको अभाव छ, सबै बिक्री भइसकेः सभामुख

३ चैत, काठमाडौं । प्रतिनिधिसभाका सभामुख देवराज घिमिरेले नेपालको पत्रकारिताबारे विवादास्पद अभिव्यक्ति दिएका छन् । उनले नेपालका सबै पत्रकार बिक्रीमा रहेको टिप्पणी गरेका छन् । शुक्रबार सिंहदरबारस्थित सभामुखको कार्यकक्षमा नेपाल पत्रकार महासंघको प्रतिनिधिमण्डलसँगको भेटमा उनले नेपाली पत्रकारिता र पत्रकारका विषयमा यस्तो अभिव्यक्ति दिएका हुन् ।

सभामुख घिमिरेले थर्काएर, किनेर, फकाएर बिग हाउसहरुले प्रभावित पारिरहेको उल्लेख गर्दै पत्रकारहरुलाई त्यसबाट मुक्त हुन नसकेको बताए । मुलुकमा पित पत्रकारिता निकै डरलाग्दो गरी देखापरेको सभामुख घिमिरेको बुझाइ छ । उनले पत्रकारहरुले जिम्मेवारीका साथ पत्रकारिता नगरेको जिकीर गर्दै त्यसको प्रभाव समाजमा परिरहेको पनि बताए ।

सभामुख घिमिरेले सरकार र पत्रकारहरुबीचको सम्बन्ध हानिकारक रहेकाले सञ्चार क्षेत्रको समस्या झनै बढेर गएको बताए । सरकारसँग राम्रो सम्बन्ध कायम गरेर मात्रै राम्रो ऐन, कानुन निर्माणका लागि पत्रकारहरुले राम्रो भूमिका निर्माण गर्न सकिने उनको भनाइ थियो ।

घिमिरेले भने,‘पित पत्रकारिता अहिले पनि निकै डरलाग्दो गरी छ । जेजे कारणले भए पनि तिनीहरु प्रभावित छन् । अझ अर्को भन्ने हो भने त बिक्रीमा छन् पत्रकारहरु । अब पत्रकारहरु बिक्रीमा छन् । संघ बिक्रीमा छ भन्यो सभामुखले भन्लान् कि भनेर मैले यसलाई रोकिरहनु पर्दैन । र, त्यो भन्नु पनि हुँदैन तपाईहरुले । किन यो त हाम्रो आफ्नो भित्री कुरा हो नि । त्यसको प्रभाव चाहिँ कुनै न कुनै रुपमा परिरहेको छ ।’

सभामुख घिमिरेले कानुनको अभावमा मुलुकमा ठगीहरु बढिरहेकाले त्यसलाई नियन्त्रण हुने गरी कानुन निर्माण गर्ने काममा सरकार र राजनीतिक दलहरुलाई सचेत बनाउने काममा पत्रकारिता क्षेत्रले काम गर्नुपर्ने बताए । उनले कानुन निर्माणमा, राष्ट्र निर्माणमा र मुलुकलाई सही बाटोमा अघि बढाउन पत्रकारहरुको भूमिका महत्वपूर्ण हुने भएकाले पत्रकारहरुले सोहीअनुसार सञ्चारका कामहरु गर्नुपर्ने बताए ।

त्यस अवसरमा महासंघका अध्यक्ष विपुल पोखरेलले मिडियामैंत्री कानुन निर्माणमा नेतृत्वदायी निर्वाह गर्न सभामुख घिमिरेको ध्यानाकर्षण गराए । यो टोलीले शुत्रबार नै राष्ट्रपति रामचन्द्र पौडेसँग पनि भेट गरेको थियो । पत्रकार सम्बन्धी कानुन र समसामयिक विषयमा छलफल गर्न गएको महासंघको प्रतिनिधि मण्डलालाई सभामुख घिमिरेले यस्तो बताएका थिए ।