नेपाल भ्रमणमा आउन भारतीय समकक्षीलाई राष्ट्रपतिको निमन्त्रण

३ चैत, काठमाडौं । राष्ट्रपति रामचन्द्र पौडेलले भारतीय समकक्षी द्रौपदी मुर्मूलाई नेपाल भ्रमणमा आउन निमन्त्रण दिएका छन् । शुक्रबार भएको दुई देशका राष्ट्रपतिबीको टेलिफोन संवादका क्रममा राष्ट्रपति पौडेलले भारितय समकक्षी मुर्मूलाई नेपाल भ्रमणम आउन आग्रह गरेका हुन् । भारती राष्ट्रपति मुर्मूले आज दिउसो टेलिफोन गर्दै नेपालका राष्ट्रपति पौडेलालाई बधाइ दिएकी थिइन् ।

सोही क्रममा पौडेलले उनलाई नेपाल भ्रमणको निम्ता दिएको राष्ट्रपति कार्यालयले जनाएको छ । शुक्रबार भारतीय राष्ट्रपति मुर्मूले टेलिफोन गर्दै पौडेललाई बधाई दिएको राष्ट्रपति पौडेलका प्रमुख स्वकीय सचिव सुरेशचन्द्र चालिसेले जानकारी दिएका छन् । चालिसेका अनुसार संवादको क्रममा राष्ट्रपति पौडेलले मुर्मूलाई नेपाल भ्रमणको निम्तो दिँदै पशुपतिनाथ दर्शन गर्न आग्रह गरेका थिए ।

भारतको केरला राज्यको भ्रमणमा रहेकी मुर्मूले राष्ट्रपतिमा पदभार ग्रहण गरेकोमा पौडेललाई शुक्रबार बधाई दिएकी हुन् । भारतको राष्ट्रपति भवनद्वारा जारी विज्ञप्ति अनुसार संवादका क्रममा राष्ट्रपति पौडेलको नेतृत्वमा भारत–नेपाल द्विपक्षीय सम्बन्ध थप उचाइमा पुग्ने राष्ट्रपति मुर्मूले विश्वास व्यक्त गरेकी थिइन् ।

उनले दुवै राष्ट्रपतिहरुले नेपाल र भारतबीचको विशिष्ट र बहुआयामिक सम्बन्ध रहेको उल्लेख गर्दै द्विपक्षीय सहयोगलाई अझ अगाडि बढाएर दुई देशका जनताबीचको मित्रताको बलियो सम्बन्धलाई थप सुदृढ गर्ने उपायहरूबारे छलफल हुनुपर्ने बताएकी थिइन् । यसअघि नै अमेरिका, चीन, पाकिस्तान लगायत मुलुकहरुबाट पनि पौडेललाई बधाई आइसकेको छ ।

यसैबीच राष्ट्रपति रामचन्द्र पौडेल र प्रधानमन्त्री पुष्पकमल दाहाल ‘प्रचण्ड’बीच पनि भेटवार्ता भएको छ । राष्ट्रपति पौडेललाई भेट्न प्रधानमन्त्री प्रचण्ड राष्ट्रपति भवन शीतलनिवासमा पुगेका थिए । पौडेल राष्ट्रपति निर्वाचित भइसकेपछि उनीहरुबीच पहिलो पल्ट भेट भएको हो । भेटमा उपराष्ट्रपतिको निर्वाचन सम्पन्न भएपछि प्रधानमन्त्रीले लिने विश्वासको मत, र सरकार विस्तार संसदमा लाने विभिन्न विधेयकका विययमा छलफल भएको राष्ट्रपतिको कार्यलयले जनाएको छ ।