प्रधानमन्त्रीलाई विश्वासको मत दिने नेकपा एसको निर्णय, महासचिवमा भुसाल मनोनित

५ चैत, काठमाडौं । नेकपा एकीकृत समाजवादीले प्रधानमन्त्री पुष्पकमल दाहाल ‘प्रचण्ड’लाई विश्वासको मत दिने निर्णय गरेको छ । आज बसेको केन्द्रीय सचिवालय बैठकले प्रधानमन्त्रीलाई विश्वासको मत दिने र संसदमा सत्तापक्षको बेन्चमा बस्ने निर्णय गरेको हो । पार्टी उपमहासचिव तथा प्रचार विभाग प्रमुख जगन्नाथ खतिवडाका अनुसार सरकारमा जाने पनि निर्णय भएको छ ।

आजको बैठकले नेता घनश्याम भुसाललाई पार्टीको महासचिवमा मनोनीत गरी महासचिव वेदुराम भुसाललाई उपाध्यक्षको जिम्मेवारी दिएको छ । बैठकले चार उपाध्यक्षहरू घनेन्द्र बस्नेत, केदार न्यौपाने, धर्मनाथ साह र केशवलाल श्रेष्ठलाई सचिवालय सदस्य मनोनीत गरेको उनले बताए । आमनिर्वाचनअघि एमाले छाडेका भुसाल गत फागुनमा एकीकृत समाजवादीमा प्रवेश गरेका थिए ।

उपाध्यक्षहरू घनेन्द्र बस्नेत, केदार न्यौपाने, केशवलाल श्रेष्ठ र धर्मनाथप्रसाद साहलाई सचिवालय सदस्यमा मनोनीत गरिएको छ । यसअघि सचिवालयमा १२ सदस्य रहेका थिए । सोमबार प्रतिनिधिसभा बैठकमा प्रधानमन्त्री प्रचण्डले राख्ने विश्वासको पक्षमा मत दिने र सत्तामा पक्षमा बस्ने निर्णय सो पार्टीले गरेको छ ।