पाँच लाख १६ हजार ५७७ जनाले एसईई दिने

५ चैत, काठमाडौं । यसवर्षको एसईई परीक्षामा ५ लाख, १६ हजार ५७७ जना परिक्षर्थी सहभागि हुने भएका छन् । चैत १७ गतेदेखि सुरु हुने परीक्षाका लागि वाग्मती र गण्डकीबाहेक सबै प्रदेशमा प्रश्नपत्र पुगिसकेको राष्ट्रिय परीक्षा बोर्डले जनाएको छ । बोर्डले प्रश्नपत्र पुग्न बाँकी दुईवटा प्रदेशमा तीन दिनभित्र पुर्याउने तयारी रहेको जनाएको छ ।

यसवर्षको एसईईमा छात्र दुई लाख ६० हजार ६६४ र छात्रा दुई लाख ५५ हजार ९१३ जना गरी कूल पाँच लाख १६ हजार ५७७ जना परीक्षार्थी सहभागी हुँदै छन् । यीमध्ये नेपाली विद्यार्थी अध्ययनरत एभरेष्ट इन्टरनेसनल स्कुल जापानबाट पनि १५ जना विद्यार्थी परीक्षामा सहभागी हुने बोर्डले जनाएको छ ।

एसईईमा सहभागी हुने पाँच लाख बढी विद्यार्थीका लागि दुई हजार ३८ वटा परीक्षा केन्द्र तोकिएको छ । सबैभन्दा बढी परीक्षा केन्द्र वाग्मती प्रदेशमा ७३४ वटा राखिएको छ भने सबैभन्दा कम कर्णालीमा १७९ वटा छन् । यसवर्ष कर्णालीबाट सबैभन्दा कम ४१ हजार ३२९ जना विद्यार्थी एसईईमा सहभागी हुँदैछन् ।