रासायनिक मलको अनुदान कटौतिको निर्णयबाट पछि हट्यो सरकार

६ चैत्र, काठमाडौं । सरकारले रासायनिक मलमा दिँदै आएको अनुदान कटौति गर्ने निर्णय तत्कालका लागि फिर्ता गरेको छ । समयमा नै मख उपलब्ध गराउन नसकेको सरकारले अनुदान रकमसमेत कटौति गरेको भन्दै विरोध सुरु भएको थियो । कृषि तथा पशुपन्छी विकास मन्त्रालयको प्रस्तावमा अघिल्लो मन्त्रिपरिषदको बैठकले रासायनिक मलमा दिँदै आएको अनुदान कटौति गर्ने निर्णय गरेको थियो ।

सोमबार बिहान प्रधानमन्त्री तथा मन्त्रिपरिषदको कार्यालय सिंहदरबारमा बसेको मन्त्रिपरिषदको बैठकले विषयगत समितिले गरेको निर्णय रोक्दै रासायनिक मलमा दिँदै आएको अनुदान यथावत राख्ने निर्णय गरेको छ । बैठकले रासायनिक मलमा दिँदै आएको अनुदानबारे विस्तृत अध्ययनपछि आवश्यक निर्णय गरी आगामी दिनमा थप व्यवस्थित र वैज्ञानिक बनाउने निर्णयसमेत गरेको सरकारका प्रवक्ता एवं सञ्चार, सूचना तथा प्रविधिमन्त्री रेखा शर्माले जानकारी दिइन् ।

यसअघि कृषि तथा पशुपन्छी विकास मन्त्रालयको मल आपूर्ति तथा वितरण व्यवस्थापन समितिको रासायनिक मलमा दिँदै आएको अनुदान कटौती गर्ने निर्णय गरेको थियो । सोमबारको मन्त्रिपरिषद बैठकपछि रासायनिक मलको अनुदान र मूल्यसमेत यथावत रहने भएको छ । कृषकलाई समयमै मल उपलब्ध गराउने मातहतका निकायलाई निर्देशन दिने निर्णय पनि मन्त्रिपरिषदले गरेको छ ।

विपक्षी एमालेलगायतका दलहरुले पनि रासायनिक मलमा किसानलाई गरिएको मूल्यवृद्धि फिर्ता गर्न सरकारसँग माग गरेका थिए । यसअघि सरकारले फागुन २६ गते रासायनिक मलमा किसानलाई दिइँदै आएको अनुदान कटौती गर्ने निर्णय गरेको थियो । जसले गर्दा किसानलाई रासायनिक मल महँगिएको थियो । एमालेको कृषि तथा पशुपन्छी विकास विकास विभागले एक विज्ञप्ति जारी गर्दै सरकारको निर्णयानुसार युरियामा प्रतिकेजी ११, डीएपीमा ७ र पोटासमा ९ रुपैयाँ मूल्य वृद्धि भएको र यसको मार नेपाली किसानमा परेको जनाएको थियो ।

एकातिर भारतबाट ठूलो मात्रामा कृषि उपजको आयात हुने र अर्कोतिर रासायनिक मलको मूल्य वृद्धि गर्दा उत्पादन लागत झन् बढ्न जाने र यसले किसानलाई निरुत्साहित गर्ने एमालेको टिप्पणी थियो । अनुदान कटौतीको निर्णयबाट सरकार स्वदेशी उत्पादनलाई निरुत्साहित गरी भारतीय कृषि उपजको व्यापार बढाउन उद्यत रहेको स्पष्ट भएको र यसले कृषि उपजमाथिको परनिर्भरता बढाउनेतर्फ सरकार लागिपरेको भन्दै एमालेले तत्काल पुरानै मूल्यमा खरिद गर्ने व्यवस्था मिलाउन माग गरेको थियो ।