ओलीबाट विगतका गल्तीहरु दोहोरिने संकेत पाएपछि समीकरण फेरिएको होः प्रचण्ड

६ चैत, काठमाडौं । प्रधानमन्त्री पुष्पकमल दाहाल ‘प्रचण्ड’ले नेकपा एमालेका अध्यक्ष केपी शर्मा ओलीले विगतमा भएका गल्ती दोहार्याउने र समझदारीहरुको पालना नगर्ने संकेत दिएपछि राजनीतिक समीकरण परिवर्तन भएको बताएका छन् । उनले निर्वाचित प्रतिनिधिसभाको बैठकमा विगतको संसद विघटनको पक्षपोषण सत्तारुढ दलका प्रमुख घटक एमाले अध्यक्ष केपी शर्मा ओलीबाट भएपछि चुनौती आउने भएकाले नयाँ समीकरण बनाउनुपरेको दावी गरेका छन् ।

प्रधानमन्त्री प्रचण्डले यसअघि पुस २६ मा विश्वासको मत दिने क्रममा ओलीले आफ्नो कार्यकालमा विगतको दूई पटकको संसद विघटनको पक्षपोषण गरेको तर्फ संकेत गर्दै यस्तो बताएका छन् । प्रचण्डले सोमबार विश्वासको मतका लागि प्रतिनिधिसभामा प्रस्ताव राख्दै विगतका कुरा नउठाउने समझदारी ओलीबाट पालना नभएको र आफूलाई चुनौती आएको बताए ।

उनले भने, ‘संसदमा पहिलो दिन नै संसद विघटनको अत्यन्त संवेदनशील विषयले प्रवेश पायो र त्यसले सिंगो देश तरंगित पनि बन्यो । त्यो विषयको उठान न सान्दर्भिक थियो न प्रासंगिक नै थियो । देशमा ठूलो राजनीतिक र संवैधानिक संकट निम्त्याएको त्यो कदम कुनै गर्वको विषय थिएन । दुई पटक सर्वोच्च अदालतले असंवैधानिक भनिसकेको र संवैधानिक निरुपण भएको अप्रिय विषयको उठानले गठबन्धनमा अविश्वास मात्रै बढाएन लोकतन्त्र र संसद्को स्थायित्वमै प्रश्न चिह्न खडा गर्यो ।’

प्रधानमन्त्री प्रचण्डले लगभग सिंगो संसद्को विश्वास पाएको प्रधानमन्त्रीलाई त्यै संसद विघटनको खुला पक्षपोषणले ठूलो संवैधानिक, राजनीतिक र नैतिक चुनौती दिएको बताए । प्रचण्डले शान्ति प्रक्रिया र संक्रमणकालीन न्याय कुनै दलविशेषको सरोकारको विषयमात्र नभएको बताए । उनले यो देशले समाधान गर्नुपर्ने राष्ट्रिय मुद्दा भएको पनि बताए । उनले अन्तर्राष्ट्रिय मानवीय कानुन, पीडित तथा सरोकारवालाबाट प्राप्त सुझाव र सर्वोच्च अदालतको आदेशको आधारमा संक्रमणकालीन न्यायसम्बन्धी संशोधन विधेयक पेश गरेको पनि बताए ।

उनले भने, ‘यो कुनै दल विशेषको मुद्दा सरोकारको मुद्दा होइन । देशले समाधान गर्ने राष्ट्रिय मुद्दा हो । यसललाई सरकारले उच्च प्राथमिकतामा राखेको छ । पुस १० मा एमालेसँग गठबन्धन गरेर न्यूनतम साझा कार्यक्रमअनुसार सरकार सञ्चालन गर्ने समझदारी भएकोमा त्यो पालना नभएको प्रचण्डको भनाइ थियो । उनले विगतका विवाद नउठाउने समझदारी भएको तर त्यो पनि पालना नभएको बताए । ’गठबन्धनका घटकबीच वैचारिक, राजनीतिमा मतभेद थिए । तर‚ हामीले न्यूनतम साझा कार्यक्रम बनाएर सहमतिको आधार तयार गरेका थियौं र विगतका मतभेदहरूलाई नउठाउने समझादरी गरेका थियौं । म त्यो प्रतिबद्धतामा कायम रहे तर केही पक्षबाट त्यसको पालना भएन,’ उनले भने ।

प्रचण्डले राष्ट्रपति निर्वाचनमा राष्ट्रिय सहमति गरौं भन्दा एमाले अध्यक्ष ओलीले नमानेको पनि बताए । विगतमा राष्ट्रपति संस्था विवादस्पद भएपछि राष्ट्रिय सहमतिमा राष्ट्रपति चयन हुनुपर्ने प्रस्ताव आफूले राखेको दाहालको भनाइ थियो । सरकारमा रहेका बेला मन्त्रीहरूसँग कुनै विवाद नभएको भन्दै किन विश्वासको मत फिर्ता लिएको भन्ने समीक्षा गर्न एमाले र राप्रपालाई प्रधानमन्त्री प्रचण्डले सुझाव दिए । ’फेरि विश्वासको मतका लागि यतिछिट्टै संसद्सँग प्रस्ताव गर्ने अवस्था आउला भन्ने मैले सोचेकै थिइनँ । राजनीतिक स्थिरताको प्रतिबद्धतासहित सरकार गठन गरेका थियौं ।’