मुलुकमा स्थायित्व ल्याउन गठबन्धन बनेको हो, कांग्रेस सरकारमा जान्छः देउवा

६ चैत, काठमाडौं । नेपाली कांग्रेस सभापति शेरबहादुर देउवाले राजनीतिक दलहरूबीचको गठबन्धन मुलुकमा स्थायित्व ल्याउनका भएको दावी गरेका छन् । संविधानको वर्तमान निर्वाचन प्रणालीले प्रतिनिधिसभामा एउटा मात्रै राजनीतिक दलको बहुमत आउने अवस्था नरहेकाले गठबन्धनको अभ्यास गर्नुपर्ने आवश्यकता परेको उनको भनाइ छ । प्रचण्ड नेतृत्वको सरकारमा कांगेस सहभागी हुने पनि उनले बताएका छन् ।

कांग्रेसका देउवाले संसद्बाटै सरकारमा सहभागी हुने घोषणा गर्दै प्रधानमन्त्री पुष्पकमल दाहाल प्रचण्डलाई विश्वासको मत दिने बताए । सोमबार प्रतिनिधिसभा बैठकमा उनले प्रधानमन्त्रीले प्रचण्ड बहुमतसहित विश्वासको मत पाउने विश्वास व्यक्त गरे । उनले अप्रत्यासित रूपमा संसद् विघटन गरेर देशलाई नै संकटमा लैजाने कदमपछि फरक राजनीतिक परिस्थिति निर्माण भएको बताए । त्यो परिस्थितिको अझै निरन्तरता आवश्यक रहेका उनले जोड दिए ।

देउवाले लोकतन्त्र, संविधान र सिंगो व्यवस्थालाई दुर्घटनामा पुर्याउने कदमविरुद्ध बनेको गठबन्धनले अब पनि स्थायित्वका लागि काम गर्ने बताए । प्रतिनिधिसभामा प्रधानमन्त्री प्रचण्डले सोमबार विश्वासको मतका लागि राखेको प्रस्तावमाथि आफ्ना धारणा राख्दै सभापति देउवाले संविधानको पक्षमा गठबन्धन हुनुपर्ने बताए । उनले भने, ‘राजनीतिक गठबन्धन आत्मकेन्द्रित, स्वार्थ प्रेरित, क्षणिक र अस्थिरता ल्याउने हुनुहुँदैन । देश र जनताको पक्षमा संविधानको रक्षा गर्ने, देशमा स्थिरता, अमनचयन, शान्ति र विकासका लागि गठबन्धन हुन आवश्यक छ ।’

सरकारले अब आरोपप्रत्यारोपमा मात्रै नलागेर शान्ति प्रक्रियाका बाँकी काम टुंगोमा पुर्याउने, विकास निर्माण र सुशासनका काम गर्नुपर्ने देउवाको भनाइ छ । कांग्रेसले प्रधानमन्त्री प्रचण्डलाई विश्वासको मत दिएर सरकारमा सहभागी हुनेसमेत बताए । देउवाले राष्ट्रिय सरोकारका साझा विषयमा सहमतिका साथ अघि बढ्नुपर्नेमा जोड दिए । सरकारमा रहेका र प्रतिपक्षमा रहेका दलहरुबीच राष्ट्रिय सरोकारका साझा विषयमा सहमतिका साथ अघि बढ्नुपर्ने बताए । उनले अघि भने, ‘कतिपय राष्ट्रिय सरोकारका विषय छन्, जसमा सबैले साझा धारणा निर्माण गर्न आवश्यक छ ।’

यस्तो पूर्ण छ देउावको भनाइ को पूर्णपाठः