संघदेखि प्रदेशसम्मका सरकारबारे छलफल सुरु भएको छः प्रधानमन्त्री

७ चैत, काठमाडौं । नेकपा मााओवादीका अध्यक्षसमेत रहेका प्रधानमन्त्री पुष्पकमल दाहाल प्रचण्डले केन्द्रिय सरकारको मन्त्रिपरिषदलाई पूर्णता दिने र प्रदेश सरकारमा आलोपालो प्रणाली लागुगर्ने विषयमा गठबन्धन दलबीच छलफल सुरुभएको बताएका छन् । उनले संघीय सरकारले पूर्णता पाए लगत्तै प्रदेश सरकार परिवर्तन हुने बताएका छन् ।

मंगलबार पालुङटार नगरपालिका–२ विमिरेमा पन्थडिही–कटहरे–हर्मी–साहिलीटार सडकको शिलान्यास समारोहलाई सम्बोधन गर्दै प्रधानमन्त्री प्रचण्डले विश्वासको मत प्राप्त भएपछि गठबन्धन दलबीच छलफल सुरु भएको बताए । उनले संघ सरकारलाई पूर्णता दिने र प्रदेश सरकारलाई पनि आलोपालो प्रणालीबाट पुनर्गठन गर्ने विषयमा छलफल सुरु भएको जानकारी दिए ।

उनले भने, ‘हिजोबाट फेरि राजनीतिक वातावरण वनेको छ, लय पक्रिएको छ । सदनमा भएका ११ पार्टीले विश्वासको मत दिएपछि सरकारलाई पूर्णता दिने प्रयत्नमा छौँ । देशलाई सुशासन सामाजिक न्याय र समृद्धिको अभियानतर्फ लैजाने प्रयासमा अब सरकार लाग्नेछ ।’ जनताको विकास निर्माण र समृद्धिको आकांक्षा सम्बोधन गर्न संघ प्रदेश र स्थानीय तहसँग एकीकृत रुपमा अघि बढ्ने उनले बताए ।

प्रचण्डले भने, ‘सरकार गठन पुनर्गठन गर्ने कुरामा छलफल भइरहेको छ, प्रदेश सरकारलाई आलोपालो प्रणालीबाट पूर्णता दिने विषयमा छलफल चल्दै छ,’ उनले भने,‘ जनताको विकास निर्माण समृद्धिको आकांक्षा सम्धोदन गर्न एकीकृत रूपमा काम अघि बढाउन, केन्द्र, प्रदेश र स्थानीय तहको समन्वय गर्न बृहत्तर बैठकको आयोजना गर्दै छु, त्यो छलफलमा देशभरको विकासलाई कसरी गति दिने गम्भीर छलफल हुन्छ ।’