ताप्लेजुङमा माओवादी नेता आङ्बोमाथि आक्रमण, गाडीमा सामान्य क्षति

७ चैत, काठमाडाैं । कोशी प्रदेश माओवादी संसदीय दलका नेता एवं पूर्वअर्थमन्त्री ईन्द्र आङ्बोमाथि आक्रमणको प्रयास भएको प्रहरीले जनाएको छ । पार्टीको कार्यक्रमका लागि पाँचथरको फिदिमबाट ताप्लेजुङ सदरमुकाम फुङलिङ आउने क्रममा आङ्बो सवार गाडी माथि आक्रमण भएको हो ।

प्रहरीका अनुसार आक्रमणबाट गाडीको सिसामा सामान्य क्षति भएकाे बताइएको छ । प्रदेशको नाम कोशी राखेको भन्दै असन्तुष्ट समूहले ताप्लेजुङमा आङ्बोमाथि आक्रमणको प्रयास हुन सक्ने प्रहरीले जनाएको छ । आक्रमण गर्नेको पहिचान भएको नभएको प्रहरीले जनाएको छ । घटना लगतै आक्रमण गर्ने समुह माथि कारबाही गर्न प्रहरीले अनुसन्धान अगाडी बढाएको छ ।

प्रदेशको नाम कोशी राखेपछि पहिचानको आधारमा नाम राख्नुपर्ने माग गर्दै आएका समूहहरु आन्दोलनमा छन् । सोमबार एक समूहले ओखलढुंगामा मुख्यमन्त्री हिक्मतकुमार कार्की सवार गाडीमा आक्रमणको प्रयास गरेको थियो ।