सभामुख निर्णायक रहेको कोशी प्रदेशमा मध्यावधिको कसरत

८ चैत, विराटनगर । प्रमुख प्रतिपक्षी दल नेकपा एमालेले कोशी प्रदेशको नेतृत्वमा तलमाथि आए मध्यावधिमा जाने संकेत दिएको छ । कोशी प्रदेशमा अहिले नेकपा एमालेका हिक्मत कार्की मुख्यमन्त्री रहेका छन् । उनी पुष १० मा केन्द्रमा भएको सहमति अनुसार कोशी प्रदेशको मुख्यमन्त्रीमा नियुक्त भएका थिए । अहिले केन्द्रमा समीकरण परिर्वत भएर नेकपा एमाले प्रतिपक्षमा पुगेपछि नयाँ बनेको सत्ता गठबन्धन प्रदेशमा सरकार परिवर्तन गर्ने तयारीमा छ ।

मुख्यमन्त्री कार्की निकट स्रोतले दिएको जानकारी अनुसार कांग्रेस एमाले लगायतका दलहरुले एमाले नेतृत्वको सरकारलाई साथ नदिए अर्को सरकार बन्ने अवस्था छैन । कोशी प्रदेशमा एमाले ४० सीटसहित पहिलो स्थानमा आउँछ । उसलाई मुख्यमन्त्रीमा कायम रहन ४७ मत चाहिन्छ । तर, राप्रपासहितको जोडदा पनि ४६ सीट मात्र हुन्छ । कोशी प्रदेशमा गठबन्धनसँग पनि ४६ सीट मात्र छ । राप्रपाले गठबन्धनलाई साथ नदिएसम्म गठबन्धनको पनि सरकार पनि बन्दैन । यो अन्योलको अवस्थामा प्रदेशलाई राख्नुभन्दा मध्यावधिमा जानु उपयुक्त हुने एमालेको ठहर छ ।

अहिले कार्की माओवादीको समर्थनमा मुख्यमन्त्रीमा कायम छ । गठबन्धनले उनलाई साथ दिने अवस्था अब रहेको छैन । माओवादीले साथ नदिएको अवस्थामा राप्रपाको सहयोगले एमालेले मुख्यमन्त्रीको पद जोगाउन सक्दैनन् । आफु मुख्यमन्त्री नरहेन अवस्था आएपछि कार्कीले मध्यावधि निर्वाचनको घोषणा गर्ने तयारी गरेका छन् । उनलाई एमालेको केन्द्रीय नेतृत्वले पनि प्रदेशसभा विघटन गरेर मध्यावधि घोषणा गर्न सल्लाह दिएको छ । कार्की एमाले अध्यक्ष केपी शर्मा ओली निकटका नेता हुन ।

मुख्यमन्त्री कार्कीले मध्यावधि निर्वाचन घोषणा गर्ने संकेत दिएपछि अहिले कांग्रेस र माओवादीका नेताहरु राजधानी पुगेका छन् । उनीहरुले शीर्ष नेतालाई भेटेर कोशी प्रदेशलाई मध्यावधिबाट जोगाउन भनिरहेका छन् । अरु दलका नेता काठमाडौं आएको माैका पारेर मुख्यमन्त्री कार्की भने आफु मुख्यमन्त्रीमा नरहने अवस्था आए तत्काल मध्यावधि घोषणा गर्ने तयारीमा छन् । यतिबेला नेपाली कांग्रेस कोशी प्रदेश संसदीय दलका नेता उद्धव थापासहितका नेता यसै विषयमा छलफल गर्न काठमाडौंमा छन् ।

उपराष्ट्रपतिको निर्वाचनपछि शनिबार देउवा, आइतबार प्रचण्ड र सोमबार नेपाललाई कांग्रेस सांसदसहित थापाले भेटघाट गरेको स्रोतको भनाइ छ । प्रदेशमा मध्यावधि निर्वाचन रोक्नका लागि दलहरु मिलेर जानुको बिकल्प नभएको उनी बताइरहेका छन् । तर, एमालेलाई मख्यमन्त्री दिनुबाहेक दलहरुसँग अर्को बिकल्प छैन । ९३ सदस्यीय प्रदेशसभामा बहुमतका लागि ४७ मत आवश्यक पर्छ । तर प्रदेशमा तत्काल रहेको दुई गठबन्धनमा ४६–४६ सदस्य मात्रै छन् । सभामुखले सदनमा निर्णयक मत दिन पाउने भए पनि सरकार गठन प्रकृयामा उनी सहभागी हुन पाउँदैनन् । अर्को राप्रपाले गठबन्धनलाई नसघाउने बताइसकेको छ ।