तीन महिनाको सुविधा दिन देउवाको संसद सचिवालयलाई पत्र

१० चैत, काठमाडौं । नेपाली कांग्रेसका सभापति शेरबहादुर देउवाले पुष ७ देखि चैत ५ गतेसम्म आफु प्रतिपक्षी दलको नेता रहेको भन्दै यस बापतको सेवा सुविधा उपलब्ध गराउन संघीय संसद सचिवालयलाई पत्र लेखेका छन् । संसद सचिवालयले सभापति देउवाले आफू विपक्षी दलको नेताको रुपमा रहँदाको सेवा सुविधा माग गर्दै पत्र लेखेको जनाएको छ ।

संसद सचिवायलका एक कर्मचारीले नेपालबहसलाई दिएकोजानकारी अनुसार नेपाली कांग्रेसका सभापति देउवाले ७ पुस २०७९ देखि ५ चैत २०७९ सम्म आफू नै प्रमुख विपक्षी दलको नेता भएको दाबी गर्दै पत्रमा सेवा सुविधा उपलब्ध गराउन भनेका छन् ।

४ मंसिरमा सम्पन्न आम चुनावबाट निर्वाचित प्रतिनिधिसभा सदस्यहरुले ७ पुसमा प्रतिनिधि सभा सदस्यको शपथ लिएका थिए । १० पुसमा पुष्पकमल दाहाल प्रचण्डको नेतृत्वमा सरकार बन्दा कांग्रेस प्रतिपक्षमा थियो । तर, २६ पुसमा प्रचण्डले प्रतिनिधिसभामा विश्वासको मत लिँदा कांग्रेसले समेत विश्वासको मत दिएको थियो । चैत ६ मा प्रधानमन्त्री प्रचण्डले पुनः विश्वासको मत माग्दा कांग्रेसले प्रचण्डलाई विश्वासको मत दिने र सरकारलाई समर्थन गर्दै सरकारमा सहभागी हुने निर्णय लिएर सत्तापक्षको बेन्चमा बसेको थियो ।