एक साताभित्र नदी किनारका अनधिकृत संरचना हटाउनूः महानगर

११ चैत, काठमाडौं । काठमाडौं महानगरपालिकाले नदी किनारमा बनेका अनधिकृत संरचना हटाउन सम्बन्धित पक्षमा फेरी सूचना जारी गरेको छ । महानगरले यस्ता संरचना आफै हटाउन सात दिनको म्याद दिएको छ । तोकिएको मितिमा नहटाए बलपूर्वक  हटाउने भनिएको छ ।

महानगरले आज शनिबार गोरखापत्रमा सूचना प्रकाशित गर्दै नदी किनार, नदी उकास तथा नदी बहाव क्षेत्रमा बनेका अनधिकृत संरचना एक साताभित्र हटाउन निर्देशन दिइएको हो । महानगरपालिकाले यसअघि पनि पटक–पटक यस्ता सूचना जारी गरी अनधिकृत संरचना हटाउन भनिएको स्मरण गराएको छ ।

एक साताभित्र नदी किनारका अनधिकृत संरचना नहटाए महानगरले ती संरचना भत्काउने र त्यसको खर्च पनि सम्बन्धित व्यक्तिबाट उठाउने सूचनामा उल्लेख छ ।

काठमाडौं महानगरभित्रका बागमती, बिष्णुमतीलगायत नदी किनारमा अनधिकृत संरचनाहरू बनेका छन् । यी संरचनाहरु ह्टाउन महानगरले यसअघि पनि प्रयास गरेको थियो । यीसंरचना हटाउने विषयमा महानगरका मेयर बालेन शाहले प्रधानमन्त्रीसहित विभिन्न दलका नेताहरु र सरकारी अधिकारीहरुसँग पनि छलफल गरेका थिए ।