माफी माग्दै खड्काले भने,‘ मैले जानाजान नियम उल्लंघन गरेकाे हैन’

१२ चैत, काठमाडौं । नेपाली कांग्रेसका उपसभापति पुर्णबहादुर खड्काले आफुबाट अनदेखा भएका कारण संसद नियमावलीको नियम मिचिने काम भएको भन्दै प्रतिनिधिसभामा माफी मागेका छन् । आइतबारको प्रतिनिधिसभा बैठकमा उपभापति खड्काले सांसद बोलिरहेका बेला उनको अगाडिबाट बाटाे काटेका थिए । यसको लगत्तै नेकपा एमालेका सचेतक महेश बर्तोलाले नियमापति जनाएका थिए ।

आइतबारको बैठकमा सांसद बलराम अधिकारी विशेष समयमा आफ्ना धारणा राखिरहेका थिए । सांसद अधिकारीले आफ्ना कुरा राखिरहेका बेला सत्तारुढ सांसदसमेत रहेका उपसभापति खड्का बैठक हलमा प्रवेश गरेर अधिकारी बोलिरहेका बेला अगाडिबाट आफ्नो सिटमा गएर बसेका थिए । प्रतिनिधिसभा नियमावलीमा कुनै सांसद बोलिरहेको बेला अगाडिबाट हिँड्न नहुने प्रावधान छ । सभामुख र बोलिरहेको सांसदको बीचबाट हिँड्न नहुने नियमावलीको नियम खड्काबाट उल्लंघन भएको थियो ।

सांसद अधिकारीले बोलिसकेपछि एमालेका सचेतक महेश बर्तौलाले नियमापत्ति जनाए । उनले भविष्यमा अरु सांसदहरूलाई पनि काम लाग्ने तर्क गर्दै खड्काको सन्दर्भमा भने, ’पटक–पटक हाउसमा एउटा मर्यादाविपरीत काम भइरहेको छ । प्रतिनिधिसभा नियमावली, २०७५ को नियम २० (६) बमोजिम सभामुखको आसन तथा बोलिरहेको सदस्यको बीचबाट हिँड्न कोही पनि सदस्यलाई अनुमति हुँदैन । पटक–पटक यो सदनको गरिमा र मर्यादालाई धज्जी उडाउँदै यसप्रकारको काम भइरहेको छ । सत्तापक्षको माननीयहरूबाट यस प्रकारको काम भइरहेको छ ।’

नियमावलीको उक्त व्यवस्था कडाइका साथ पालना गराउन सचेतक बर्तौलाले सभामुखको ध्यानाकर्षण गराएका थिए । सभामुख देवराज घिमिरेले नियमापत्तिको विषयमा ध्यान दिन सांसदहरूलाई आग्रह गरेपछि उपसभापति खड्काले आफूबाट नियम मिचिएको स्वीकार्दै क्षमा मागेका थिए । उनले अनदेखाको कारणले माननीयले उल्लेख गर्नु भए अनुसार मैले नियमावलीको त्यो दफालाई उल्लंघन गरेँ भन्दै त्यसका लागि माफी मागेका थिए ।