अलमलमा गठबन्धनः मन्त्रिपरिषद पहिले न्युनतम साझा कार्यक्रम ?

१२ चैत, काठमाडौं । सोमबार मन्त्रिपरिषदलाई पूर्णता दिने भनिएपनि अन्ततः मन्त्रिपरिषद विस्तारमा ढिलाई हुने देखिएको छ । दलभित्रै मन्त्री छान्न सकस परेपछि सत्ता गठबन्धनका शीर्ष नेताहरु मन्त्रिपरिषद विस्तार भन्दा पहिले सरकारका न्युनतम साझा कार्यक्रम बनाउनेतर्फ अग्रसर देखिएका छन् । तर, अहिलेसम्म न्युनतम साझा कार्यक्रम कसरी बनाउने भन्ने तयारी भएको छैन र यसका लागि कार्यदल पनि बनाइएको छैन् ।

प्रधानमन्त्री पुष्पकमल दाहाल ’प्रचण्ड’ले विश्वासको मत पाएलगत्तै मन्त्रिपरिषद्लाई पूर्णता दिने बताए अनुसार छलफल सुरु भएनि भागबन्डाको टुंगो लगाउन दलहरुले सकिरहेका छैनन् । गठबन्धनमा दलहरूको संख्या धेरै भएकाले भागबन्डामा समस्या भएको हो । आइतबार नेकपा एकीकृत समाजवादीका अध्यक्ष माधवकुमार नेपालले सरकारको न्युनतम साझा कार्यक्रममा हस्ताक्षर भएपछि मात्र सरकारले पूर्णता पाउने भनाइ बाहिर ल्याएका छन् ।

आइतबार संघीय संसद भवन नयाँ बानेश्वरमा सञ्चारकर्मीहरुसँग कुराकानी गर्दै अध्यक्ष नेपालले नयाँ बनेको गठबन्धनका दलहरुका बीचमा सरकारको साझा नीति तथा कार्यक्रमको सम्बन्धमा छलफल भइरहेको बताए । उनले भने ‘आज बल्ल सरकारको जुन नीतिगत प्रतिवद्धता हो, साझा नीति र कार्यक्रम अगाडि सार्नुपर्ने, त्यसको निम्ति छलफल भइराखेको छ । छलफल भएर टुंगो लाग्ला । त्यो कागजमा हस्ताक्षर होला । त्यही वैचारिक मान्यता, त्यही नीतिगत मान्यता, त्यही कार्यक्रमको मान्यताको आधारमा नै सरकारले पूर्ण आकार प्राप्त गर्नेछ ।’

अध्यक्ष नेपालले आफ्नो पार्टीले गृह, अर्थ र परराष्ट्र मन्त्रालयको दाबी नगरेको बताए । उनले देशको अर्थतन्त्रको समस्यालाई राम्ररी बुझेको र समस्याको समाधान दिनसक्ने व्यक्तिलाई अर्थमन्त्री बनाउन आफूले प्रधानमन्त्रीलाई सुझाव दिएको धारणा राखेका थिए । उनले आफुलै कहिलेपनि गृह र अर्थ मन्त्रालय नमागेको तर, अर्थ मन्त्रालय देशको अर्थतन्त्रका समस्याहरुलाई राम्ररी बुझ्न सक्ने व्यक्ति पठाउन भनेको बताए ।

यता, नेपाली कांग्रेसका उपसभापति पूर्णबहादुर खड्काले पनि सत्तारूढ दलहरूका बीचमा मन्त्रालयको भागबन्डा नटुंगिएको बताएका छन् । उनका अनुसार गठबन्धन दलका नेताहरूका बीचमा छलफल भइरहेको भएपनि कुन पार्टीले कुन मन्त्रालय भन्नेमा टुंगो लागेको छैन । कांग्रेसले पनि कसको नेतृत्वमा सरकारमा जाने र को–को मन्त्री भएर जाने भन्नेमा निर्णय गरिनसकेको दाबी उनको छ । तर, खड्का नै कांग्रेसबाट नेतृत्व लिएर सरकरामा जाने चर्चा चलिरहेको छ ।

कांग्रेसले पनि औपचारिक रूपमा कुनै निर्णय गरेको छैन । कांग्रेस मात्रै होइन कुनैपनि दलले कुन मन्त्रालय लिएर सहभागी हुने भन्ने बारेमा अन्तिम निर्णय गरिसकेका छैनन् । कांग्रेस नेताहरु मन्त्रिपरिषद विस्तारमा मंगलबारदेखि बिहीबार पुग्ने बताएका छन् । सत्ता गठबन्धनका शीर्ष नेताहरुनै पहिले मन्त्रिपरिषद कि साझा कार्यक्रम भन्नेमा पनि अलमलमा छन् । भागबण्ड मिलाउन कठिन भएकाले मन्त्रालयको संख्या बढाउनेबारे पनि छलफल चलिरहेको बताइन्छ ।