आज पार्टीबाट नाम टुंग्याएर भोली मन्त्रिपरिषदलाई पूर्णता दिने तयारी

१३ चैत, काठमाडौं । सत्ता गठबन्धनका तीन शीर्ष नेताले आज पार्टीबाट मन्त्री बनाउनेको नाम टुंगो लगाएर भोली मंगलबार प्रचण्ड नेतृत्वको मन्त्रिपरिषदलाई पूर्णता दिने निर्णय गरेका छन् । कांग्रेस, माओवादी र नेकपा एकीकृत समाजवादीले आज सरकारमा जाने मन्त्रीहरुको नाम टुंग्याउने भएका छन् । सोमबार बिहान प्रधानमन्त्रीको सरकारी निवास बालुवाटारमा भएको छलफलमा यस्तो निर्णय भएको हो ।

मन्त्रिपरिषद विस्तारमा ढिलाई भएको भन्दै प्रधानमन्त्री र सत्ता गठबन्धन दलका नेताहरुको आलोचना बढेर गएपछि नेपाली कांग्रेसका सभापति शेरबहादुर देउवा, प्रधानमन्त्री पुष्पकमल दाहाल‘प्रचण्ड’ र नेकपा एकीकृत समाजवादीका अध्यक्ष माधवकुमार नेपालबीच भोलीसम्ममा जसरी पनि मन्त्रिपरिषद विस्ताको काम सक्ने निर्णय भएको हो ।

प्रधानमन्त्री प्रचण्डको सचिवालयले दिएको जानकारी अनुसार आज दलहरुबाट मन्त्रीहरुको नाम टुंगो लगाएर भोली अपरान्ह ४ बजे १० दलको बैठकमा पेस भएपछि मन्त्रिपरिषद विस्तार भएर नयाँ मन्त्रीसहितको बैठक बस्नेछ । चैत ६ गते दोस्रो पटक विश्वासको मत लिएका प्रधानमन्त्री प्रचण्डले मन्त्रिपरिषदलाई पूर्णता दिन अझै सकेका छैनन् । प्रचण्ड प्रधानमन्त्रीमा नियुक्त भएको तीन महिना कटिसकेको छ । तर, अहिलेसम्म मन्त्रिपरिषदले पूर्णता पाएको छैन् ।