नागरिक आन्दोलनमा घुसेको भन्दै राप्रपाविरुद्ध माइतीघरमा नाराबाजी

१४ चैत, काठमाडौं । आफुहरुको आन्दोलन विशुद्ध ठगी र सामन्तीविरुद्ध भएको र यस्ता आन्दोलनमा घुसपैठ गरेर सामन्तीहरुले फाइदा उठाएको भन्दै मिटरब्याज पीडितहरुको आन्दोलनमा ऐक्यबद्धता जनाउन माइतीघरमा पुगेका राप्रपाका सांसद ज्ञानेन्द्र शाहीविरुद्ध नाराबाजी भएकाे छ । उनीहरुले राप्रपाविरुद्ध पनि नारावाजी गरेका छन् ।

राप्रपा राजवादी र सामान्तवादी रहेकोले यसका नेता पनि सामान्ती र शोषक नै हुने भन्दै मिटरब्याजी पीडितहरुले उनीबिरुद्ध नाराबाजी गरेका हुन् । आफूहरुको आन्दोलन नागरिक आन्दोलन भएको भन्दै उनीहरुले राजावादी र सामन्तवादीको समर्थन र ऐक्यबद्धता नचाहिने बताए । पीडितहरुले नेता शाहीलाई तत्काल आन्दोलनबाट बाहिर जान भनेका थिए ।

बिहान टंगालमा धर्ना बसेका उनीहरु भद्रकाली हुँदै माइतीघर मण्डलामा पुगेर फेरि धर्नामा बसेका छन् । उनीहरु पुग्ने वित्तिकै ज्ञानेन्द्र शाही पनि आन्दोलनमा ऐक्यबद्धता जनाउने भन्दै माइतीघरमा पुगेका थिए । ज्ञानेन्द्र शाहीले भने आफू जनप्रतिनिधि भएको नाताले नागरिकको समस्या बुझ्न आएको बताएका थिए । तर मिटरब्याज पीडितले उनको कुरै सुन्न चाहेनन् र उनीबिरुद्ध चर्को नाराबाजी गरिरहे ।