सहमति विनै गठबन्धन बैठकमा ‘लञ्च ब्रेक’, दिउँसो ३ बजे बस्ने

१५ चैत, काठमाडौँ । सत्तारुढ १० दलको बैठक दिउँसो ३ बजेसम्मका लागि स्थगित भएको छ । प्रधानमन्त्री निवास बालुवाटारमा बसेको १० दलको बैठकमा मन्त्रालयको भागबण्डा र न्युनम साझा कार्यक्रमा सहमति नभएपछि दिउँसो ३ बजे बस्ने गरी स्थगित भएको हो ।

बैठकमा आज दुबै विषयमा सहमति जुटाउने र भोली मन्त्रिपरिषद विस्तार गरी सरकारका न्युनतम साझा कार्यक्रल सार्वजनिक गर्ने विषय सहमति नजिक पुगेको कांग्रेस नेता रमेश लेखकले बताए । उनले सम्भवतः भोलि मन्त्रिपरिषद विस्तारको कुरा आज ३ बजे बस्ने बैठकले निर्णय गर्ने जानकारी दिए । उनले अहिलेको बैठक लन्च ब्रेकका लागि स्थगित गरिएको बताए ।

बालुवाटारमा बसेको बैठकमा मन्त्रिपरिषद विस्तारबारे छलफल भए पनि सहमति भइनसकेको जनता समाजवादी पार्टी (जसपा) का अध्यक्ष उपेन्द्र यादवले जानकारी दिए । “लञ्च ब्रेक भएपछि हामी फेरि ३ बजे बस्ने गरी उठेको उनले बताए ।

मन्त्रिपरिषदबारे आजै टुंगो लगाउने प्रधानमन्त्री प्रचण्डको तयारी छ । गठबन्धनको बैठक हिजो साँझ पनि बसेको थियो । हिजोको बैठकमा सरकारको न्यूनतम साझा कार्यक्रमको मस्यौदा वितरण गरिएको थियो । साथै, गठबन्धनका दलहरुले मन्त्रालयबारे आफ्नो दाबी पेस गरेका थिए ।