साझा न्यूनतम कार्यक्रम भोली मात्रः लेखक

१५ चैत्र,काठामडौं ।  नेपाली कांग्रेसका नेता उवं प्रमुख सचेतक रमेश लेखकले भोलीसम्ममा सरकारको न्यूनतम साझा  कार्यक्रमले अन्तिम रुप पाउने बताएका छन् ।

संघीय संसद् भवन नयाँ बानेश्वरमा बुधबार सञ्चारकर्मीहरुसँग कुराकानी गर्दै उनले सरकारको साझा न्यूनतम कार्यक्रमले बिहीबार (भोलि) सम्ममा अन्तिम रुप प्राप्त गर्ने बताए ।

उनले कार्यक्रमको मस्यौदा सत्तारुढ गठबन्धनका नेताहरुसमक्ष पुगेको र आवश्यक संशोधनका लागि आज साँझ ५ बजेसम्मका लागि समय दिइएकोले भोली मात्र यसको अन्तिम टुंगो लाग्ने बताए ।

‘न्युनतम कार्यक्रम बनिराखेको छ । साझा न्यूनतम कार्यक्रममा काम भइराखेको छ । हामीले ड्राफ्ट गरिसकेका छौं । त्यो ड्राफ्ट प्रस्तुत भएको छ सरकारसँग जोडिएका दलहरुका नेताहरुका बीचमा ।

आज पाँच बजेसम्ममा कसैको त्यसमा संशोधन, केही कुरा थप्नुपर्ने, केही कुरा झिक्नुपर्ने, केही सुधार गर्नुपर्ने कुरा भयो भने गर्ने । भोलिसम्ममा साझा न्यूनतम कार्यक्रमले अन्तिम रुप प्राप्त गर्छ ।’