सत्ता गठबन्धनको बैठक छाडेर प्रधानमन्त्री प्रचण्ड चितवनमा

१६ चैत, काठमाडौं । नेकपा माओवादी केन्द्रका अध्यक्षसमेत रहेका प्रधानमन्त्री पुष्पकमल दाहाल ‘प्रचण्ड’ बालुवाटारको बैठक छाडेर चितवन पुगेका छन् । सत्ता गठबन्धनको बैठकमा मन्त्रिपरिषद् विस्तारबारे छलफल भइरहेको थियो । प्रचण्डले मन्त्रिपरिषद् विस्तारको विषयमा सत्ता साझेदार दलका शीर्ष नेताहरूसँग केहिबेर छलफल गरेका थिए । छलफल लगत्तै चितवन गएका प्रचण्डले त्यहाँबाट फर्किएपछि मन्त्रिपरिषद् विस्तार गर्ने तयारीमा छन् ।

कृषि तथा वन विज्ञान विश्वविद्यालयको तेस्रो दीक्षान्त समारोह र भरतपुर विमानस्थलको टर्मिनल भवन शिलान्यासमा सहभागी हुन प्रधानमन्त्री गएका हुन् । प्रधानमन्त्रीको सचिवालयका अनुसार उनी बैठकमा केहिबेर बसेर चितवन गएको र चितवनबाट फर्केपछि बेलुकासम्म मन्त्रिपरिषद् विस्तार गर्ने तयारी छ । बुधबार सत्ता साझेदार दलहरूबीच मन्त्रालय बाँडफाटमा मोटामोटी समहति भएपछि प्रधानमन्त्री प्रचण्डले आज मन्त्रिपरिषद् विस्तारका लागि तयारी थालेका हुन् ।

पूर्वनिर्धारित कार्यक्रम भएकाले उनी त्यहँ गएका हुन् । दिउँसो १ बजे काठमाडौँ आउने कार्यतालिका रहेको छ । प्रचण्ड फर्किएपछि गठबन्धनको बैठक बसेर मन्त्रिपरिषद् विस्तार हुने बताइएको छ । प्रचण्डले आज ९ दललाई समेटेर मन्त्रिपरिषद् विस्तार गर्न लागेका हुन् । यसबारे बुधबारकै बैठकमा लगभग सहमति बनेको नेताहरूको भनाइ छ । मन्त्रालयको टुंगो लगाउन सत्तारुढ गठबन्धनको कसरत जारी नै छ ।
संख्यामा सहमतिपछि सत्तारुढ गठबन्धन मन्त्रालयको टुंगो लगाउन बाँकी छ । बिहीबार बिहान प्रधानमन्त्री निवास बालुवाटारमा गठबन्धनको बैठकले कुनैठोस निर्णय लिएको छैन् । बुधबार ग ठबन्धनको बैठकले मन्त्रालय भागबन्डामा सहमति गरेको थियो । सहमतिअनुसार कांग्रेस ८, माओवादी ५, जसपा २, एकीकृत समाजवादी २, लोसपा, नागरिक उन्मुक्ति, जनमत, आमजनता र नेसपाले १÷१ मन्त्रालय लिने तय भएको छ ।

बैठकले न्यूनतम साझा कार्यक्रमलाई अंतिम रूप दिने पनि नेताहरूले बताएका छन् । माओवादीका वरिष्ठ उपाध्यक्षसमेत रहेका नारायणकाजी श्रेष्ठको जिम्मेवारी हेरफेर हुने भएको छ । श्रेष्ठले सम्हालिरहेको भौतिक पूर्वाधार तथा यातायात मन्त्रालय एकीकृत समाजवादीलाई दिन प्रधानमन्त्री पुष्पकमल दाहाल तयार भएका छन् ।

श्रेष्ठलाई उपप्रधानसहित गृह मन्त्रालयको जिम्मेवारी दिने तयारी छ । गृहमा माओवादीकै अर्का नेता शक्ति बस्नेतको पनि दाबी छ । एकीकृत समाजवादीलाई अर्को मन्त्रालय कुन दिने भन्नेमा सहमति भइसकेको छैन । प्रधानमन्त्री प्रचण्डले शिक्षा र कृषिमध्ये एक मन्त्रालय दिने प्रस्ताव गरेका छन् । एकीकृत समाजवादीले बेदुराम भुसाल र प्रकाश ज्वालालाई मन्त्री बनाउने निर्णय गरिसकेको छ ।

गठबन्धनको ठूलो दल कांग्रेसले अर्थ, परराष्ट्र, रक्षासहित ८ मन्त्रालय पाउने भएको छ । कांग्रेसले सहरी विकास र ऊर्जा, जलस्रोत तथा सिँचाइ मन्त्रालयमध्ये एक पाउनुपर्ने अडान राखेको छ । यी दुई मन्त्रालयमा माओवादी र अन्य साना दलको पनि दाबी छ । कांग्रेसको भागमा महिला बालबालिका तथा ज्येष्ठ नागरिक, कानुन, न्याय तथा संसदीय मामिला, स्वास्थ्य, उद्योग वाणिज्य तथा आपूर्ति, युवा तथा खेलकुदमध्ये एक पर्न सक्ने सम्भावना छ  ।

प्रचण्डले जसपालाई शिक्षा, वन, कृषि र उद्योगमध्येबाटै दुई मन्त्रालय दिन चाहेका छन् । जसपाले पनि सहरी मन्त्रालयमा दाबी गरेको छ । प्रधानमन्त्री दाहाललाई विश्वासको मत दिएको राष्ट्रिय स्वतन्त्र पार्टी भने तत्काल सरकारमा सहभागी नहुने भएको छ । रास्वपा सरकारमा सहभागी हुँदा उसले पाउने तीन मन्त्रालय कांग्रेस र माओवादीबाट मिलाउने समझदारी छ ।

नागरिक उन्मुक्तिबाट अध्यक्ष रञ्जिता श्रेष्ठ चौधरी आफैं सरकारमा जाने भएकी छन् । लोसपाले श्रम, कृषि, उद्योगमध्ये एउटा मन्त्रालय पाउने भएको छ, जसमा शरदसिंह भण्डारी जानेछन् । नेसपा नेता महेन्द्रराय यादव र आम जनता पार्टीका सांसद प्रभु साह पनि मन्त्री बन्ने भएका छन् ।