मन्त्रिपरिषद विस्तारबारे राष्ट्रपति र प्रधानमन्त्रीबीच छलफल

१७ चैत, काठमाडौं । राष्ट्रपति रामचन्द्र पौडेल र प्रधानमन्त्री पुष्षकमल दाहाल ‘प्रचण्ड’बीच मन्त्रिपरिषद विस्तार र सरकारले संसदमा ल्याउन लागेका विधेयकका बारेमा शीतलनिवासमा छलफल भएको छ । शुक्रबार बिहान भएको छलफलमा प्रधानमन्त्री प्रचण्डले आज मन्त्रिपरिषदलाई पूर्णता दिनेबारे जानकारी गराएका थिए । प्रधानमन्त्री प्रचण्ड राष्ट्रपति पौडेललाई भेट्न बिहान राष्ट्रपति कार्यालय पुगेका थिए ।

राष्ट्रपतिका प्रेस सहयोगी खिला कार्कीले दिएको जानकारी अनुसार सरकारले संसदमा दर्ता गराएका विधेयक र लाने तयारीमा रहेका विधेयकबारे पनि छलफल भएको थियो । सत्य निरुपण तथा मेलमिलाप र वेपत्ता पारिएका परिवार छानविन आयोग गठन सम्बन्धी विधेयक, संवैधानिक परिषद गठन सम्बन्धि संशोधित विधेयक र नागरिकता विधेयक लगायतका विषयमा छलफल भएको थियो ।

छलफलका क्रममा वर्षमान राजनीतिक घटना र सरकारका न्यनुतम साझा कार्यक्रमबारे पनि प्रधानमन्त्री प्रचण्डले राष्ट्रपतिलाई जानकारी गराएका थिए । दलहरुबाट मन्त्रीको नाम आएपछि जतिसम्दो चाँडा मन्त्रिपरिषदलाई पुर्णता दिने तयारीमा प्रधानमन्त्री रहेका छन् । सत्ता गठबन्धनमा रहेका १० दलबीच मन्त्रालय बाँडफाँडमा सहमति जुटेसँगै मन्त्रीमण्डललाई पूर्णता दिन लागिएको हो ।

पुस १० गते प्रधानमन्त्री बनेका प्रचण्ड नेतृत्वको सरकारबाट एमाले, रास्वपा र राप्रपा बाहिरिएपछि नेपाली कांग्रेस लगायतका दललाई समेटेर मन्त्रिमण्डल विस्तार गर्ने तयारीमा लागेका हुन् । तीन दलले सरकार छोडेपछि प्रधानमन्त्रीको जिम्मेवारीमा १६ मन्त्रालय छन् ।