गोविन्दराज जोशी र विकास कोइरालामाथिको कारबाही फुकुवा

१९ चैत्र, काठमाडौं । नेपाली कांग्रेसले पूर्वमन्त्रीसमेत रहेका तनुहँका गोविन्दराज जोशी र चितवनका पुर्वजिल्ला सभापति दिनेश कोइरालामाथि गरेको कारवाही फुकुवा गरेको छ । आज बसेको कांग्रेस केन्द्रीय समितिको बैठकले उनीहरुमाथि गरेको कारवाही फुकुवा गर्ने निर्णय गरेको हो । उनीहरुसँगै बाराका पनि केहि नेता कार्यकर्तामाथिको कारवाही फुकुवा गरिएको छ ।

उनीहरुलाई २०७९ भन्दा पहिले स्वतन्त्र उम्मेदवारी दिएर पार्टी अनुशासन उल्लंघनको कारवाही गरिएको थियो । बारा, तनहुँ र चितवन नेताहरुको पुरानै सदस्यता निरन्तरता हुने गरी कारबाही फुकुवा गर्ने निर्णय भएको कांग्रे सहमहामन्त्री बद्री पाण्डेले नेपालबहसलाई जानकारी दिएका छन् । उनले अनुसार कारबाही फुकुवा गरेका नेताहरुले उपनिर्वाचनमा खेल्ने भूमिकालाई हेरेर आगामी दिनमा निर्णय गर्ने र अनुशासन समितिलाई सक्रिय पार्ने निर्णय भएको बताए ।

तनहुँका पूर्वमन्त्री जोशी गत निर्वाचनमा रामचन्द्र पौडेलविरुद्व बागी उम्मेदवारी दिएपछि कारबाहीमा परेका थिए । मंसिर ४ गतेको निर्वाचनमा तनहुँ–१ मा स्वतन्त्र उम्मेदवार बनेका थिए । चितवनका कोइराला पूर्वजिल्ला सभापति हुन् । २०७० सालको संविधानसभा निर्वाचनमा पार्टीका तत्कालीन केन्द्रीय सभापति सुशील कोइरालाविरूद्ध तत्कालीन चितवन–४ बाट स्वतन्त्र उम्मेदवार उठेपछि विकास कोइराला कारबाहीमा परेका थिए ।

कांग्रेसले बारा क्षेत्र नम्बर २ को उपनिर्वाचनमा जनता समाजवादी पार्टीका उम्मेदवारलाई सघाउने निर्णय गरेको छ । बैठकमा जसपाको उम्मेदवारलाई सघाउने सभापति शेरबहादुर देउवाले राखेको प्रस्ताव पारित भएको सहमहामन्त्री जीवन परियारले जानकारी दिए । गत निर्वाचनमा पार्टीलाई असहयोग गरेको भन्दै कारवाहीमा परिका अन्य जिल्लाका नेताहरुको अनुशासन कारवाही भने यथावत राखिएको छ ।