विश्वासको मत लिनेभन्दा राजीनामा दिनेतिर लाग्न गिरीलाई विपक्षीको दवाव

२० चैत, बुटवल । अल्पमतमा परेका लुम्बिनी प्रदेशका मुख्यमन्त्री लिला गिरीलाई विपक्षी दलहरुले प्रदेशसभाबाट विश्वासको मत नपाउने देखिएकाले तत्काल पदबाट राजीनामा गर्न दवाव दिएका छन् । पक्ष विपक्षमा प्रदेश सरकारको नेतृत्वलाई लिएर दलहरुबीच केहि दिनयता ठूलै रस्साकस्सी चलिरहेको छ । यसैबिच आज बेला लुम्बिनी प्रदेशसभाको बैठक पनि डाकिएको छ ।

प्रदेशसभा सचिवालयका अनुसार सोमबार दिउँसो १ बजेका लागि बैठक आह्वान गरिएको छ । प्रदेशका सभामुख तुलाराम घर्तीको निर्देशनमा लुम्बिनी प्रदेशसभा नियमावली, २०७९ नियम १२ को उपनियम (३) बमोजिम अनुरुप सोमवारको बैठक आह्वान गरिएको हो । सो बैठकमा मुख्यमन्त्री लिला गिरीले लुम्बिनी प्रशिक्षण प्रतिष्ठान सम्बन्धी विधेयक पेस गर्ने कार्यतालिका छ । तर, यसको कांग्रेस माओवादी लगायतका दलहरुले विरोध गरिहेका छन् ।

प्रतिपक्ष दलहरुले बिशेष समयमा मुख्यमन्त्री गिरीको राजीनामा माग्ने कार्यतालिका बनाएका छन् । नेकपा माओवादी केन्द्रसहित केन्द्रीय सत्तारुढ गठबन्धन आबद्ध दलले समर्थन फिर्ता लिएको भन्दै राजीनामा दिनु पर्ने मागलाई बैठकमा उठाउने उनीहरुको तयारी छ । माओवादीलगायतको समर्थनमा मुख्यमन्त्री बनेका एमालेका गिरीलाई केन्द्रिय राजनीति परिवर्तन भएलगत्तै माओवादी लगायतले समर्थन फिर्ता लिइसको छन् ।

यसपछि उनले राजीनामा दिनु पर्ने बिषय उठाइदै आएपनि गिरीले भने संविधान अनुसार ३० दिन भित्र विश्वासको मत लिन खोजिरहेका छन । प्रतिपक्षी दलहरुले गिरीको राजीनामापछि नेपाली कांग्रेसका संसदीय दलका नेता डिल्लीबहादुर चौधरीलाई मुख्यमन्त्री नियुक्त गर्न भन्दै यसअघि नै प्रदेश प्रमुख अमक्ष दावी पेस गरिसकेका छन् । राजनीति खितानीका कारण प्रदेश सरकारले जनताका काममा भने ध्यान दिन सकिरहेका छैन ।