चितवन-२ मा पौडेलको कांग्रेस हराउ र कोइराला जिताउ अभियानमा

२० चैत, काठमाडौं । पार्टीको हित विपरित गतिविधि गरेको आरोपमा कारवाहीमा परेका जगन्नाथ पौडेल र विकाश कोइराला नेपाली कांग्रेसका प्रभावशाली नेता हुन् । चितवनको राजनीतिमा राम्रो पकड राख्न सक्ने नेता भएपनि आन्तरिक विषयका असन्तुष्टिलाई लिएर कांग्रेस अनुशासन समितिले उनीहरुलाई कारवाही गरेको थियो । कोइरालामाथिको कारवाही पार्टीले फुकुवा गरिसकेको छ भने पौडेल अझै कारवाहीमा नै छन् ।

कांग्रेसको केन्द्रीय समितिको बैठकले चितवनका पूर्वसभापति विकास कोइरालामाथिको कारवाही फुकुवा गरेको छ । उनी २०७० सालको संविधानसभा निर्वाचनमा पूर्वप्रधानमन्त्री एवं तत्कालीन केन्द्रीय सभापति सुशील कोइरालाविरूद्ध बागी उम्मेदवारी दिएपछि उनलाई कारवाही गरिएको थियो । झण्डैं १० वर्ष पार्टीको कारबाहीमा परेका कांग्रेस चितवन पूर्वजिल्ला सभापति विकास कोइरालालाई भने आइतवार मात्र कांग्रेस कार्य सम्पादन समितिले कारबाही फुकुवा गर्ने निर्णय गरेको थियो ।

कांग्रेस चितवन भित्र बलियो पकड रहेका नेता कोइराला २०७० सालको संविधानसभा निर्वाचनमा चितवनका तत्कालिन क्षेत्र नं. ४ बाट पार्टी केन्द्रीय सभापति सुशील कोइरालाकाविरुद्ध बागी उम्मेदवारी दिएपछि कारबाहीमा परेका थिए । कारबाही फुकुवाको माग गर्दै आएका कोइरालाले फुकुवा भएको खबर सामाजिक सञ्जाल र समाचारहरुबाट थाहा पाएको बताएका छन् ।

उनले यसलाई सकारात्मक रुपमा लिएको भन्दै आफ्नो निरन्तरको खबरदारी, पार्टी नेता कार्यकर्ताहरुको दवावमा परेर मात्रै निर्वाचनको मुखमा कारबाही फुकुवा भएको भए यसलाई पार्टीको उदारता मान्न नसकिने बताएका छन् । नेता कोइरालाले पार्टीभन्दा बाहिर भएपनि खास विशेष अवस्थामा पार्टीका अभियानहरुमा साथ दिँदै आएको र कांग्रेसबाट विचलित पनि नभएको भन्दै उपनिर्वाचनमा कांग्रेसकै उम्मेदवारलाई साथ दिने बताएका छन् । आफू सरहका नेता पार्टीको महामन्त्री भएको भन्दै नेता कोइरालाले मागेरभन्दा पनि लडेर भूमिका लिने पक्षमा आफु रहेकाे बताएका छन् । गत मंसिरको निर्वाचन अगाडि कोइरालाले कारबाही फुकुवाका लागि दवाव दिन भन्दै पत्रकार सम्मेलन गरेका थिए ।

विकास र दिनेश कोइराला नातामा काका भजित हुन । यस्तै नेपाली कांग्रेसको केन्द्रीय सदस्य त्यागेर चितवन–३ मा प्रतिनिधिसभा सदस्यका लागि उम्मेदवार बनेका दिनेश कोइरालाले पनि उपनिर्वाचनमा कांग्रेस उम्मेदवारलाई मत मागेका छन् । आगामी १० गते हुने उपनिर्वाचनको मनोनयन दर्ताको पूर्वसन्ध्यामा वक्तव्य जारी गर्दै उनले तनहुँ–१ र चितवन–२ का कांग्रेस उम्मेदवारलाई मत मागेका हुन् ।

चितवन–२ मा कांग्रेसबाट जीतनारायण श्रेष्ठ र तनहुँ–१ मा गोविन्द भट्टराईले सत्ता गठबन्धनकातर्फबाट उम्मेदवारी दिंदैछन् । गत निर्वाचनमा चितवन–३ बाट कांग्रेसबाट उम्मेदवार बन्न चाहेका कोइराला उक्त क्षेत्र माओवादीको भागमा परेपछि स्वतन्त्र उम्मेदवार बनेका थिए । चितवन ३ मा गठबन्धनका साझा उम्मेदवार माओवादीका भोजराज अधिकारीविरुद्ध कोइरालाले कांग्रेसबाट बिद्रोह गरी स्वतन्त्र उम्मेदवारी दिएका थिए । एमालेको समर्थनका बाबजुद पनि कोइराला मंसिर ४ को चुनावमा पराजित भएका थिए । तर कोइरालाले आज अपिल जारी गर्दै वैशाख १० को उपनिर्वाचनमा कांग्रेसका उम्मेदवारलाई चितवन २ र तनहुँ १ मा मतदान गर्न आग्रह गरेका छन् ।

चितवन नेपाली कांग्रेसको प्रभावमूलक क्षेत्र भएपनि सत्ता समीकरणको राजनीतिले गर्दा गएका दुई स्थानीय तहको निर्वाचनमा कांग्रेसले चितवन महानगरमा उम्मेदवारी दिएन । यही कारणले यो क्षेत्रका नेता कार्यकर्ता पार्टी नेतृत्वसँग असन्तुष्ट भएर एकप्रकारको विद्रोह नै सुरु भयो । सुरु देखि नै गठबन्धनको विपक्षमा रहेका पौडेलले पहिलेको स्थाननीय तहको निर्वाचनबाटै असन्तुटि जनाउँदै पार्टीको विपक्षमा लागका थिए । गएको स्थानीय तहको निर्वाचनमा उनले चितवन महानगरमा उम्मेदवारीसमेत दिएका थिए ।

पौडेल नेपाली कांग्रेसका पुराना र प्रभावशाली नेता हुन् । गएको स्थानीय तहको निर्वाचनान चितवन महागनरमा नेकपा माओवादी उम्मेदवार रेनु दाहाललाई सघाउन पार्टी नेतृत्वले निकै कसरत गरेपनि उनले मानेन् र भूइकटहर चिह्नबाट चुनाव लडेका थिए । उनले चितवन २ मा हुन गइरहेको उपनिर्वाचनमा राष्ट्रिय स्वतन्त्र पार्टीका उम्मेदवार रवि लामिछानेलाई सघाउने औपचारिक घोषणा गरेका छन् । पौडेलले पत्रकारहरुमार्फत आफ्नो समर्थन रास्वपालाई रहने बताएका छन् ।

छोटो समयमा देशले रुपान्तरण खोजेको र त्यो रुपान्तरणको निमित्त उपयुक्त टिमको आवश्यकता पर्ने भएकाले त्यो टिममा ऊर्जावान व्यक्तिहरुको आवश्यकता पुरा गर्न रास्वपालाई सघाउने बताएका छन् । उनले पार्टी प्रवेश नगर्ने र अहिले समर्थन मात्र दिने बताएका छन् । पौडेल रवि लामिछानेसँगै निर्वाचन अधिकृतको कार्यालयमा पुगेका थिए । स्थानीय तह निर्वाचन र प्रतिनिधिसभा निर्वाचनमा पौडेल पार्टीको आधिकारिक निर्णयविरुद्ध चुनाव लडेका थिए ।