उपनिर्वाचनको मनोनयन दर्ता अघि तनहुँमा कांग्रेसको सभा

तनहुँ, २० चैत । नेपाली कांग्रेसले उपनिर्वाचनमा उम्मेदवारको मनोनयन गर्नुअघि तनहुँमा आमसभाको आयोजन गरको छ । उक्त आमसभामा कांग्रेस महामन्त्री गगन थापासहित गण्डकी प्रदेशका कांग्रेस नेताहरु उपस्थित भएका छन् । उनीहरुले तनहुँ १ बाट कांग्रेसका उम्मेदवार गोविन्द भट्टराईलाई निर्वाचनमा जिताउन नेता कार्यकर्ता डटेर लाग्नुपर्ने बताएका छन् ।

आगामी १० वैशाखमा हुने उपनिर्वाचनको सोमबार मनोनयन दर्ताको समय तोकिएको छ । बारा–२, चितवन–२ र तनहुँ–१ मा १० वैशाखमा प्रतिनिधिसभा सदस्य चयनका लागि उपनिर्वाचन हुन लागेको हो । जसका लागि सोमबार मनोनयन दर्ता प्रक्रिया चलिरहेको छ । तनहुँ १ बाट कांग्रेसका तर्फबाट गोविन्द भट्टराईले मनोनयन दर्ता गर्दैछन् ।

मनोनयन दर्ताअघि तनहुँमा कांग्रेसले सभा गरिरहेको छ । कांग्रेस महामन्त्री गगनकुमार थापाले भट्टराई गठबन्धनका साझा उम्मेदवार रहेका बताएका छन भने अन्य नेताहरुले पनि भट्टराई जनपक्षीय उम्मेदवार भएकाले मत माग्ने कुरामा डटेर लाग्नुपर्नेमा जोड दिएका छन् ।
तनहुँ क्षेत्र नम्बर–१ को उपनिर्वाचन रोचक बन्ने देखिएको छ । गएको मंसिर–४ मा भएको निर्वाचनमा यो क्षेत्रमा नेपाली कांग्रेसका उमेदवार रामचन्द्र पौडेल निर्वाचित भएका थिए । पौडेल राष्ट्रपति निर्वाचित भएपछि यो क्षेत्र रिक्त भएको हो ।

कांग्रेसले राष्ट्रपति रामचन्द्र पौडेलले जितेको तनहुँ–१ मा त्यहीँका स्थानीयसमेत रहेका केन्द्रीय सदस्य गोविन्द भट्टराईलाई उमेदवार बनाएको छ । ०५४ सालमा नेपाल विद्यार्थी संघको केन्द्रीय अध्यक्ष चलाइसकेका भट्टराईलाई कांग्रेसले बलियो उमेदवारका रुपमा प्रस्तुत गरिरहेको छ ।
नेकपा माओवादी केन्द्रसहितका पार्टीको उमेदवार नहुने र नेकपा एमालेसँग मात्र प्रतिस्पर्धा हुँदा भट्टराई बलिया देखिएको टिप्पणी भइरहेको थियो । तर, कांग्रेसको राजनीतिमा सक्रिय अर्थविद् डा. स्वर्णिम वाग्लेलाई राष्ट्रिय स्वतन्त्र पार्टीले उमेदवार बनाएपछि प्रतिस्पर्धा रोचक हुने विश्लेषण सुरु भएको छ ।