३ वर्षे कार्यकालाका लागि बारको निर्वाचन भोली, १ हजार ८ सय मतदाता मतदानबाट बञ्चित

काठमाडौं । नेपाल बार एशोसिएशन केन्द्रीय कार्यसमितिको तीन वर्षे कार्यकालका लागि भोली निर्वाचन हुँदै छ । २५ औं केन्द्रीय कार्यसमितिको निर्वाचनमा १ हजार ८ सय नयाँ कानून व्यवसायीले भने मतदान गर्न नपाउने भएका छन् ।

बारको निर्वाचन आउनका लागि एक दिन मात्र बाँकी रहेको अवस्थामा सर्वोच्च अदालतका न्यायाधीश तेजबहादुर केसीको एकल इजलासले हिजो निर्वाचनमा भाग लिन नपाउनुका कारण देखाउ आदेश जारी गरेपछि मतदानबाट बञ्चित हुने भएका हुन् ।

रुकुम जिल्ला बार एकाइका संस्थापक कोषाध्यक्ष लोकेन्द्र ओली र काठमाडौं जिल्ला बार एकाइका सदस्य उमा प्रसाईंले पेश गरेको रिट निवेदन सर्वोच्च प्रशासनले यही चैत ८ गते दरपीठ (दर्ता गर्न अस्वीकार) गरेको थियो । सो दरपीठविरुद्ध इजलासमा निवेदन परेकोमाथि सुनुवाइ हुँदा हिजो मात्र कारण देखाउ आदेश जारी भएको छ ।

सो मुद्दामा वरिष्ठ अधिवक्ता डा. सुरेन्द्र भण्डारी, अधिवक्ता डासीराम ढुङ्गाना, विनोद फुयाँल, कमल कोइराला, लक्ष्मी थापा, रिट निवेदनक ओलीले बहस गरेका थिए । बारको निर्वाचनमा मताधिकारबाट बञ्चित हुनुपर्ने कुनै कानूनी आधार नभएको तर्क उनीहरुले प्रस्तुत गरेका थिए ।

निर्वाचनमा मताधिकारबाट बञ्चित भएपछि मतदान गर्न पाउनुपर्ने माग राख्दै पेश गरेको रिट निवेदन सर्वोच्च अदालतका रजिस्ट्रार महेन्द्रनाथ उपाध्यायले दरपीठ गरेका थिए ।

बारको चुनावी भेला
बारले कार्यसमितिको निर्वाचनका लागि प्रगतिशील, पेशागत तथा समावेशी समूह र ‘बृहत् लोकतान्त्रिक समूह’ले छुट्टाछुट्टै चुनावी भेला गरेका छन् । चुनावी भेलालाई संशोधन गर्दै अध्यक्षका उम्मेदवार दुवैले निष्ठावान् र प्राज्ञिक न्यायलय बनाई न्यायपालिकाको प्रमुख प्रतिपक्षको भूमिका निर्वाह गर्नका लागि आ–आफ्नो समूहले जित्नुपर्ने जिकिर गरेका थिए ।

प्रगतिशील, पेशागत तथा समावेशी समूहका तर्फबाट अध्यक्षका उम्मेदवार वरिष्ठ अधिवक्ता चण्डेश्वर श्रेष्ठले बारलाई व्यावसायिक, प्राज्ञिक र मर्यादिन बार बनाउन र स्वतन्त्र तथा निष्पक्ष न्यायपालिका निर्माणका लागि आफ्नो समूहले जिप्नुपर्नेमा जोड दिएका थिए । लोकतान्त्रिक समूहका अध्यक्षका उम्मेदवार सुनील पोखरेलले नेतृत्व केन्द्रितभन्दा पनि नीति केन्द्रित बार बनाइ प्राज्ञिक र भ्रष्टाचारमुक्त बार बनाउनका लागि आफ्नो समूहले जित्नुपर्नेमा जिकिर गरेका छन् ।

बारमा एक अध्यक्ष, एक महासचिव, एक कोषाध्यक्ष, महिला उपाध्यक्ष एक जना र सातै प्रदेशबाट एक÷एक जना गरी आठ जना उपाध्यक्ष निर्वाचित हुनेछन् । गत फागुन ६ गते मनोनयन दर्ता गरेको थियो । बारको २५ कार्यसमितिका लागि ६३ जनाको उम्मेदवारी परेको छ । देशभर रहेका १० हजार ३१३ मतदाताले ३५ मतदान केन्द्रबाट मतदान गर्नेछन् ।