दुवै खुट्टा गुमाएका पूर्वगोरखा सैनिक सगरमाथा आरोहणका लागि प्रस्थान

२२ चैत, काठमाडौं । दुवै खुट्टा गुमाएका पूर्वगोरखा सैनिक हरि बुढामगर सर्वोच्च शिखर सगरमाथा आरोहणका लागि सोलुखुम्बु पुगेका छन् । उनी आज बिहान त्रिभुवन विमानस्थलस्थित आन्तरिक उडानमार्फत सगरमाथाआधार शिविरतर्फ प्रस्थान गरेका हुन् ।

दुवै खुट्टा नभएका उनी कृत्रिम (प्रोस्थेटिक) खुट्टाको सहायतामा सगरमाथा आरोहण गर्न आधार शिविरतर्फ लागेका हुन् । उनी कृत्रिम खुट्टाको सहायतामा सगरमाथाको आधारशिविर पुगेर ‘स्काइड्राइभिङ’ गर्ने पहिलो व्यक्ति बनेका छन् ।

रोल्पा जिल्लाको मिरूलका उनले ५ वर्षको पर्खाइपछि सगरमाथा चढ्न जान अनुमति पाउँदा खुसी लागेको बताए । सगरमाथाको सफल आरोहण हुनेमा उनले विश्वास व्यक्त गरे । आरोहण दुई महिनाको हुने उनले बताए । 

उनले सन् २०१० मा अफगानिस्तानको लडाईंमा दुवै खुट्टा गुमाएका थिए । उसले यसअघि मोन्ट ब्लांक (४,८१०), चुलु सुदूरपूर्व (६,०५९) किलिमन्जारो (५,८९५) र मेरा पिक (६,४७६) आरोहण गरिसकेका छन् ।