उत्तर प्रदेशका मुख्यमन्त्री आदित्यनाथको अभिव्यक्तिप्रति विप्लवको आपत्ति

२२ चैत, काठमाडौं । नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ले भारतका उत्तरप्रदेशका मुख्यमन्त्री आदित्यनाथले नेपालबारे दिएको अभिव्यक्तिप्रति कडा आपत्ति जनाएका छन् । 

यही चैत २० मा विश्व हिंन्दु सम्मेलनमा भारत उत्तर प्रदेशका मुख्यमन्त्री आदित्यनाथले नेपालमा राजतन्त्र र हिंन्दु धर्म हुनुपर्छ भनेर दिएको अभिव्यक्तिप्रति समाजवादी देशभक्त मोर्चाका अध्यक्ष मण्डलका अध्यक्ष समेत रहेका विप्लवले बुधबार एक प्रेस विज्ञप्ति जारी गर्दै कडा आपत्ति जनाएका हुन् । 

मुख्यमन्त्री आदित्यनाथको भनाइले नेपालको सार्वभौमिकता, राजनैतिक स्वतन्त्रता र जनभावनामाथि ठाडो हस्तक्षेप रहेको भन्दै उनले नेपालमा कायम रहेको संसदीय व्यवस्था दलाल पूँजीवादी सत्ता भएको र यो पूर्णरुपमा असफल भइसकेको बताएका छन् । 

नेपालमा कस्तो राजनैतिक व्यवस्था हुने र बनाउने साथै धर्म मान्नेकि नमान्ने भन्ने अधिकार पूर्णतः नेपाली जनतामा भएको उनले विज्ञप्तिमार्फत स्पष्ट पारेका छन् । साथै संसदीय व्यवस्थाको संकटको निकास र विकल्प जनवादी गणतन्त्र या वैज्ञानिक समाजवादी व्यवस्था मात्र भएकाे उनको भनाइ छ ।

‘यतिबेला नेपालको दलाल पूँजीवादी सत्ता र संसदीय व्यवस्था असफल भएको सत्य हो । तर यो व्यवस्था पनि नेपाली जनताको छनोटबाट स्थापित नभइ नयाँ जनवाद—वैज्ञानिक समाजवादलाई रोक्नका लागि भारत, अमेरिका लगायतको निर्देशनमा लादिएको व्यवस्था हो । यसको विकल्प र समाधान राजतन्त्र हुन सक्दैन । संसदीय व्यवस्थाको संकटको निकास र विकल्प जनवादी गणतन्त्र या वैज्ञानिक समाजवादी व्यवस्था मात्र हुन सक्छ’ विज्ञप्तिमा उल्लेख छ । 

उनले विभिन्न साम्राज्यवादी शक्तिहरु नेपालमा अस्थिर र अनिश्चित राजनैतिक अवस्था बनाइराख्न चाहने र अग्रगामी निकासलाई रोक्न सुनियोजित तवरले लागिरहेको बताउँदै नेकपासहित ४ पार्टी यस षडयन्त्रलाई असफल पार्न निरन्तर लाग्ने समेत बताएका छन् । 

उनले आदित्यनाथको अभिव्यक्ति त्यसैको एउटा अंश भएको र यसबारे.समयमै सचेत नभएमा भयानक घटनाहरु देखा पर्ने संभावना रहेको बताए । संभावित घटनालाई पन्छाउन राष्ट्रवादी, अग्रगामी, परिवर्तनकारी एवं क्रान्तिकारी पक्षधर दल र नागरिक एकजुट हुन आह्वान गर्दै उनले विदेशी हस्तक्षेपको प्रतिरोध गर्ने संघर्षको नेतृत्व गर्न मोर्चा हरदम तयार रहेको बताएका छन् ।