एसईई परीक्षामा नक्कली परीक्षार्थी पक्राउ

२२ चैत, विराटनगर । प्रहरीले मोरङको ग्रामथान गाउँपालिका–२ स्थित एक परीक्षा केन्द्रबाट अर्कैको नाममा एसईई परीक्षा दिने नक्कली परीक्षार्थीलाई पक्राउ गरेको छ ।

अनिवार्य विज्ञान विषयको परीक्षा दिने  क्रममा बुधबार सरस्वती माध्यमिक विद्यालय केन्द्रबाट २८ वर्षीय सुस्मिता लिम्बूलाई पक्राउ गरेको हो । उनलाई कल्पना लिम्बूको परीक्षा दिइरहेको अवस्थामा भेटिएको प्रहरीले जनाएको छ । 

नरग्राम माध्यमिक विद्यालय टंकीसिनवरीकी परिक्षार्थी सि. नं. ००९१२४९७ भएकी कल्पना लिम्बूको परीक्षा दिइरहेको अवस्थामा उनलाई प्रहरीले नियन्त्रणमा लिएको हो । सुस्मिता सुनसरीको धरान उपमहानगरपालिका–५ की रहेको खुलेको छ । 

पक्राउ परेका लिम्बूमाथि आवश्यक अनुसन्धान  भइरहेको प्रहरीले जनाएको छ । यही चैत  १७ बाट सुरू भएकाे याे वर्षकाे एसईई परीक्षा २९ गतेसम्म चल्नेछ ।