नाबालिकालाई भारतमा बेचबिखन गर्ने गिरोह कारागार चलान

२२ चैत, काठमाडौं । धादिङकी १६ वर्षीया नाबालिकालाई भारत पुर्‍याई बेचविखन गरेको कसुर मुद्दामा जिल्ला अदालत धादिङले ७ जनालाई पुर्पक्षका लागि कारागार चलान गरेको छ ।

गएको माघ १५ मा पक्राउ परेका उनीहरुलाई मानव बेचबिखन तथा ओसारपसार र संगठित अपराध कसुरमा अनुसन्धान सकेर यही चैत १६ मा मुद्दा दर्ता गराइएको  थियो । सो मुद्दामा जिल्ला न्यायाधीशको एकल इजलासले मुद्दाको अन्तिम टुंगो नलाग्दासम्म कारागार थुनामा राख्न आदेश भएको हो ।

कारागार चलान हुनेहरुमा काठमाडौं कागेश्वरी मनहरा नगरपालिका–६ की ३२ वर्षीया कविता बानियाँ आचार्य, सोलुखुम्बु नेचासल्यान गाउँपालिका–२ की ३५ वर्षकी कमला नेपाली, धादिङ त्रिपुरासुन्दरी गाउँपालिका–३ की ३६ वर्षकी गीता न्यौपाने, कल्पना आले मगर, ४४ वर्षका रूपेन्द्र अधिकारी, २१ वर्षकी अस्मिता नेपाली र त्रिपुरासुन्दरी १ का कोपिला दमइ छन् । 

उनीहरूलाई मुद्दा पुर्पक्षका लागि मंगलबार धादिङ कारागारमा पठाइएको प्रहरीले जनाएको छ । गएको मंसिर १५ गतेबाट धादिङकी हराइरहेकी नाबालिकालाई उनीहरूले भारतको दिल्लीस्थित पहाडगञ्जमा पुर्‍याएर बेचबिखन गरेको खुलेपछि पक्राउ गरी मुद्दा चलाइएको थियो । 

अभियुक्तहरुले पूजा गर्दा प्रशस्त पैसा आफैं झर्छ भनी पैसाको प्रलोभनमा पारी बालिकाको शरीरको उचाइ, तौल समेत लिई शरीरमा कुनै किसिमको दाग नरहेको फोटो, भिडियो सामाजिक सञ्जालबाट तस्करहरूलाई पठाएका थिए ।

पछि तस्करकै योजनामा बालिकाकालाई गुपचुप रुपमा धादिङ मलेखुबाट रूपन्देहीको सुनौली नाका हुँदै भारतको पहाडगञ्ज पुर्‍याइएको थियो । ती बालिकालाई नेपाल प्रहरी प्रधान कार्यालय मानव बेचबिखन ब्यूरो बबरमहल काठमाडौं र जिल्ला प्रहरी कार्यालय धादिङको संयुक्त पहलमा भारतबाट उद्धार गरिएको थियो ।