मन्त्री पठाउन देउवा र कोइरालाबीच अझै टसल

२२ चैत्र, काठमाडौं । नेपाली कांग्रेसको अन्तरिक विवादको असर सरकारमा परेको छ । प्रधानमन्त्री पुष्पकमल दाहाल प्रचण्डले मन्त्रिपरिषदलाई पुर्णता दिन नसकेको आरोप खेपिरहेपनि कांग्रेसमा अझै भागबण्डमा सहमति भएको छैन् । कांग्रेसले प्रचण्ड नेतृत्वको मन्त्रिपरिषदमा चार जना मन्त्री पठाउन बाँकी छ । पार्टी सभापति शेरबहादुर देउवा कोइराला समूहलाई दुई भन्दा नदिने र कोइराला समुह दुई मात्रले नहुने अडानमा बसेको छ ।    

प्रधानमन्त्री प्रचण्डले आज र भोलीभित्रमा कांग्रेसले मन्त्रीको नाम पठाउने र मन्त्रिपरिषद विस्तार भएपछि सरकार नीति कार्यक्रम तर्फ लाग्ने बताइरहेका छन । तर, कांग्रेसबाट मन्त्रीको नाम दिने छाँटकाट छैन् । प्रधानमन्त्रीले विश्वासको मत पाएको दुई साता बितिसक्दा पनि मन्त्रिपरिषद्ले पूर्णता नपाउँदा सरकारका कामकारवाहीसमेत प्रभावित भइरहेका छन् । आम जनतामा पनि नराम्रो सन्देश गइरहेको छ । 

सत्ता गठबन्धनको ठूलो दल कांग्रेसकै कारण अझै छ वटा मन्त्रालय रिक्त छन् । कांग्रेस सभापति देउवाले पार्टीभित्रका गुट र आकांक्षी व्यवस्थापन गर्न अझै पनि तयार भएका छैनन् । कतिपय मन्त्रालय एक महिनादेखि मन्त्रीविहीन छन् भने ती मन्त्रालयकालागि प्रधानमन्त्रीले समय दिन नभ्याउँदा कार्यसम्पादनमा असर परेको छ । गठबन्धनको सहमतिबमोजिम एक मन्त्रालय पाएको जनमत पार्टीले पनि रोजेको मन्त्रालय नपाएपछि सरकार छोडेको छ । कांग्रेसले आठ मन्त्री र एक राज्यमन्त्री पाउने सहमति भएको थियो ।

अब परराष्ट्र, कानून न्याय तथा संसदीय मामिला, युवा तथा खेलकूद, स्वास्थ्य तथा जनसंख्या, वन तथा वातावरण र खानेपानी मन्त्रालय बाँकी छन् । यसअघिको सहमतिबमोजिम कांग्रेसले यीमध्ये चार मन्त्रालय पाउनेछ । जनमत पार्टीले छोडेपछि बनको सट्टा खानेपानी मन्त्रालयमा कांग्रेसले दावी गरेको छ । कसलाई मन्त्री बनाउने भन्ने टुंगो नलाग्दा कांग्रेसका भागमा कुन कुन मन्त्रालय हुन भन्ने पनि अन्योल छ । नेता शेखर कोइराला पक्षले तीन मन्त्रालय पाउनुपर्ने माग छाडेको छैन् । 

कांग्रेस इतर समूहले मन्त्रालयको संख्या टुंगो नहुँदासम्म नाम नपठाउने बताइरहेका छ । उता, सभापति देउवाले चार मन्त्री बनाउँदा पार्टीमा आफ्नो प्रत्यासी कोइराला पक्षलाई मात्रै होइन, नेताहरू शशांक कोइराला, प्रकाशमान सिंह, कृष्णप्रसाद सिटौला र विमलेन्द्र निधिलाई पनि समेटेका छैनन् । उनीहरुलाई पनि समेट्नुपर्ने सभापपति देउवामाथि दवाव छ ।  तीन मन्त्रालयमा दाबी गरेको कोइराला समूहमा पनि दुई वा तीन जनालाई नै मन्त्री बनाएपनि कसलाई मन्त्री बनाउने भन्ने विषय टूंगिएको छैन् ।

यसअघि तयार गरेको सूचीमा उपसभापति धनराज गुरुङ र मोरङ कांग्रेसका सभापति डिकबहादुर लिम्बुको नाम समेटिएको थियो । बुधबार विहानको छलफलमा पनि सभापति देउवाले आफु पक्षका नेतासँग मात्र छलफल गरेका छन् । धुम्बाराहीमा बुधबार बसेको शीर्ष नेताहरूको बैठकले सरकारमा पठाउन बाँकी ४ मन्त्रीमध्ये २ जनाको नाम टुंग्याएको छ । एक नेताले दिएको जानकारीअनुसार केन्द्रीय सदस्यद्वय मोहनबहादुर बस्नेत र नारायणप्रकाश (एनपी) साउद मन्त्री बन्ने टुंगो लागेको छ ।

साउद गत मंसिरको चुनावमा कञ्चनपुर– २ बाट प्रतिनिधि सभा सदस्य निर्वाचित भएका थिए। सुदूरपश्चिम प्रदेशको प्रतिनिधित्व गराउँदै कांग्रेसले उनलाई मन्त्री बनाउन लागेको हो । यस्तै बस्नेत सिन्धुपाल्चोक–२ बाट प्रतिनिधि सभा सदस्य निर्वाचित भएका थिए। उनलाई बागमती प्रदेशबाट प्रतिनिधित्व गर्ने गरी मन्त्री बनाउन लागिएको हो । कांग्रेसले सात प्रदेशको प्रतिनिधित्व हुने गरी र समावेशी सिद्धान्तअनुसार मन्त्री छानेर सरकारमा पठाउने मापदण्ड बनाएको थियो ।

गठबन्धनमा कांग्रेसले ८, माओवादी केन्द्रले ५, नेकपा एसले २, जसपाले २, जनमत, लोसपा, नागरिक उन्मुक्ति र नेपाल समाजवादी पार्टीले १–१ मन्त्रालय पाउने सहमति भएको थियो । सहमतिअनुसार जसपाले एक मन्त्री पठाएको छैन । उपनिर्वाचन जितेपछि जसपाका अध्यक्ष उपेन्द्र यावद आफैँ सरकारमा जाने मनस्थितिमा छन्  । यसले पनि मन्त्रिपरिषद्ले  तत्काल पूर्णता पाउने देखिएको छैन् ।