रवि लामिछानेले नागरिकता लिँदा निस्सा नबुझाएको रिट पक्षका वकिलको जिकिर

२२ चैत, काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेमाथि राहदानी विवादमा मुद्दा चलाउनुपर्ने मागसहित दायर भएको रिट निवदेनमा रिट पक्षका वकिलहरुले बहस गरेका छन् । 

सिन्धुलीका युवराज पौडेलले सोमबार दिएको रिटको सुनुवाइ न्यायाधीश हरिप्रसाद फुयालको एकल इजलासमा भइरहेको छ । सुनुवाइमा बहस गर्दै रिट निवेदकका वकिल वरिष्ठ अधिवक्ता सुरेन्द्र भण्डारीले लामिछानेले गएको माघ १५ गते जिल्ला प्रशासन कार्यालय काठमाडौंबाट नागरिता लिँदा विदेश (अमेरिका)को नागरिकता त्याग गरेको निस्सा नबुझाएको जिकिर गरे । 

माघ १५ गते आइतबार भएकाले उक्त दिन उनले अमेरिकी नागरिकता त्यागेको निस्सा प्रशासनमा बुझाएकोमा आफूलाई शंका रहेको भन्दै प्रशासन कार्यालयबाट निस्सा झिकाउनुपर्ने माग गरे । लामिछानेको नागरिकता विवादसम्बन्धी मुद्दामा दिन अगाडि अर्थात माघ १३ गते शुक्रबार प्रक्रिया पूरा गरेर नेपाली नागरिकता नलिएको ठहर गर्दै पुनः नेपाली नागरिकता लिनुपर्ने फैसला गरेको थियो । 

शुक्रबारको फैसलाअनुसार नेपाली नागरिकता लिएको दिन आइतबार रहेको र सो दिन अमेरिकी दूतावास समेत बन्द रहेको अवस्थामा अमेरिकी नागरिकता त्यागेको निस्सा बुझाउन सकिने अवस्था नै नदेखिएको भण्डारीको दाबी छ । 

नागरिकता त्याग गरेको निस्सा अमेरिकी विदेश मन्त्रालयले दिने र सो निस्सालाई दूतावासले प्रमाणीकरण गरेपछि मात्र औपचारिक रुपमा नेपाली नागरिकता लिने प्रक्रिया सुरु हुने उनको तर्क छ । ‘आइतबारका दिन अमेरिकी दूतावास विदा हुन्छ। उहाँले कसरी प्रमाणीकरण भएको निस्सा पेस गर्नुभयो ?’ उनले इजलासमा प्रश्न गरे । उनले जिल्ला प्रशासन कार्यालयबाट त्यो निस्सा मगाउन उनले माग गरे ।

लामिछानेको राहदानीसम्बन्धी विवादमा मुद्दा नचलाउने निर्णय गर्दा महान्यायाधिवक्ताले कानुनसम्मत निर्णय नगरेको भण्डारीको तर्क थियो । नेपालको कानूनले झुठा विवरण दिएर राहदानी लिन मात्र नभई लिने प्रयत्न गर्नुलाई पनि अपराध मानेको बताउँदै लामिछानेले अपराध गरेको बताए । 

रिट निवेदकका तर्फबाट भण्डारीसँगै अधिवक्ता राधिका खतिवडा, रमण कर्णलगायतले बहस गरेका छन् । रिटमाथि दुवै पक्षको बहस सकिएको छ । आदेश आजै आउने संभावना छ । 

प्रतिनिधिसभा सदस्य (सांसद) रहेका बेला नागरिकतासम्बन्धी विवादमा सर्वोच्च अदालतमा परेको रिटमा गत माघ १३ गते सर्वोच्चले लामिछानेले प्रयोग गर्दै आइरहेका पुरानो नागरिक रद्द गर्ने र प्रक्रिया पुर्याएर नयाँ नागरिकता लिनुपर्ने फैसला सुनाएको थियो । सो फैसला अनुसार उनले दुई दिनपछि १५ गते जिप्रका काठमाडौं पुगेर पुरानै नम्बरको नागरिकता प्राप्त गरेका थिए । साथै सोही दिन राहदानी विभागमा पुगेर पुरानो नागरिकताबाछट लिएका राहदानी समेत फिर्ता गरेका थिए ।

त्यसपछि पनि उनीविरुद्ध दोहोरो नागरिकता लिएर दुरुपयोग गरेको आरोपमा पौडेलले नै यही सोमबार सर्वोच्चमा रिट दायर गराएका हुन् ।