रवि लामिछानेविरुद्ध राहदानी दुरुपयोग मुद्दा चलाउनुपर्ने माग भएको रिटमा कारण देखाऊ आदेश

२२ चैत, काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्ध दोहोरो राहदानी प्रयोग गरी अधिकार दुरुपयोग गरेको विषयमा अनुसन्धान गर्न पक्राउका लागि अन्तरिम आदेश मागसहित सर्वोच्चमा परेको रिटमा कारण देखाऊ आदेश जारी भएको छ ।

न्यायाधीश हरिप्रसाद फुयाँलको एकल इजलासमा बुधवार सुनुवाइ सकिएपछि विपक्षीका नाममा यस्तो आदेश जारी भएको हो । मुद्दा नचलाउने निर्णयबारे लिखित कारण पेस गर्न आदेश भएको छ ।

रिट सिन्धुलीका युवराज पौडेलले सोमबार दायर गराएका थिए । उनले महान्यायाधिवक्ताको कार्यालय, जिल्ला सरकारी वकिलको कार्यालय काठमाडौं, महानगरीय प्रहरी काठमाडौं परिसर टेकु, लामिछानेलगायत ८ पक्षलाई विपक्षी बनाएका थिए । 

बुधवार निवेदक पक्षका तर्फबाट वरिष्ठ अधिवक्ता सुरेन्द्र भण्डारी लगायतले बहस गरेका थिए भने प्रतिवादी लामिछानेको पक्षबाट दुई जना कानून व्यवसायीहरुले बहस गरेका थिए । 

सन् २०१५ मा लामिछानेले अमेरिकी राहदानी कायमै रहेको अवस्थामा नेपाली राहदानी लिएर दोहोरो राहदानी प्रयोग गरी राहदानी दुरुपयोग कसुर गरेको दाबी गर्दै रिट निवेदक पौडेलले लामिछानेविरुद्ध त्यससम्बन्धी मुद्दा चलाउनु नपर्ने भनी प्रहरीको प्रतिवेदन र जिल्ला सरकारी वकिलको कार्यालयको रायले महान्यायाधिवक्ताको कार्यालयले गरेको निर्णय उत्प्रेषण आदेशबाट बदरको माग गरिएको थियो ।