सन्दीप लामिछानेविरुद्धको मुद्दामा फेरि सर्याे सुनुवाइ

२२ चैत, काठमाडौं । क्रिकेटर सन्दीप लामिछानेविरुद्धको नाबालिका बलात्कार मुद्दामा आज पनि जिल्ला अदालत काठमाडौंमा सुनुवाइ भएन । 
न्यायाधीश केशवप्रसाद घिमिरेको इजलासमा तोकिएको मुद्दा पेसीमा पछाडिको क्रममा रहेकाले सुनुवाइका लागि पालो नआएको अदालत प्रशासनले जनाएको छ । 

क्रिकेटर लामिछानेका कानुन व्यवसायीले केहीबेर सुनुवाइ गरेर हेर्दाहेर्दैमा राखेर निरन्तरता दिन आग्रह गरेका थिए । 

क्रिकेटर सन्दीपविरुद्ध नुवाकोटकी एक नाबालिकालाई गत भदौ ५ गते राति काठमाडौंको पिंगलास्थानस्थित होटल काठमाडौं इनमा पुर्याई बलात्कार गरेको आरोपमा पीडितले प्रहरीमा जाहेरी दिएकी थिइन् । सोही आधारमा प्रहरीले अनुसन्धान सकेर लामिछानेविरुद्ध काठमाडौं जिल्ला अदालतमा जबर्जस्ती करणी कसुरमा मुद्दा दायर गरेको थियो ।

मुद्दामा प्रारम्भिक सुनुवाइ गर्दै अदालतले लामिछानेलाई मुद्दाको अन्तिम टुंगो नलागेसम्मका लागि जेल चलान गरेको थियो । तर टुंगो लाग्न बाँकी रहँदै सन्दिीपले काठमाडौं अदालतको आदेश बदरको माग गर्दै उच्च अदालत पाटनमा दिएको रिटमा उच्चले गत माघ २७ मा २० लाख रुपैयाँ धरौटीमा उनलाई रिहा गरेको थियो ।

त्यसयता उनी कारागारबाहिर छन् । धराैटीमा छुटेपछि  नेपाल क्रिकेट संघ (क्यान)ले समेत उनलाई राष्ट्रिय टिममा फर्काएर अन्तर्राष्ट्रिय प्रतियोगिता खेलाइरहेको छ । मुद्दाको अन्तिम टुंगो लाग्न भने बाँकी छ ।