निर्माण व्यवसायीलाई इजाजतपत्र नवीकरण गराउन चैत मसान्तसम्मको समय

२३ चैत, काठमाडौं । भौतिक पूर्वाधार तथा यातायात मन्त्रालयले निर्माण व्यवसायीलाई यही चैत मसान्तभित्र सार्वजनिक निर्माण व्यवसायसम्बन्धी इजाजतपत्र नवीकरण गरिसक्न सूचना जारी गरेको छ । 

मन्त्रालयको निर्माण व्यवसाय प्रवर्द्धन शाखाले आज सूचना जारी गर्दै इजाजत नवीकरण चैत मसान्तभित्र गरिसक्न अनुरोध गरेको हो ।

सार्वजनिक निर्माण कार्य गर्न दिइने इजाजत पत्रको अवधि प्रत्येक आर्थिक वर्षमा समाप्त हुन्छ । इजाजत पत्रको अवधि समाप्त भएको मितिले तीन महिनाभित्र नवीकरण गराउनुपर्दछ ।

उक्त अवधिभित्र नवीकरण नगर्ने व्यवसायीले म्याद नाघेको ६ महिनाभित्र थप दस्तुर तिरेर नवीकरण गराउन सक्ने व्यवस्थाबमोजिम नविकरणको मौका दिइएको हो । यसपछि पनि ६ महिना बितिसकेको अवस्थामा भने नवीकरण नहुने र इजाजतपत्र स्वतः खारेज हुने व्यवस्था रहेको शाखाद्वारा जरी सूचनामा जनाइएको छ । 

साथै, इजाजत पत्र नवीकरण गराउन आउँदा पछिल्लो आर्थिक वर्षको कर चुक्ताको प्रमाणपत्र समेत अनिवार्य ल्याउन भनिएको छ ।